युवती बेचबिखनका अभियुक्तलाई १० वर्ष कैद

आदर्श समाज सम्वाददाता
फागुन २२, २०७५
jail prison

लमजुङ, २१ फागुन। लमजुङमा युवती बेचबिखनका एक अभियुक्तलाई १० वर्ष कैद सजाय गरिएको छ। जिल्ला अदालत लमजुङले सो फैसला गरेको हो। जिल्ला अदालत लमजुङले १७ वर्षीया युवतीलाई बेचबिखन गरेको अभियोगमा ५० हजार रुपियाँ जरिवानासहित १० वर्ष कैद फैसला गरको हो।

पीडित किशोरीलाई ३० हजार रुपियाँ क्षतिपूर्ति दिनुपर्ने फैसलासमेत लमजुङ जिल्ला अदालतको फैसलामा उल्लेख भएको अदालतका स्रेस्तेदार भूमिप्रसाद शर्माले बताए। उनका अनुसार जिल्ला न्यायधिश कोमलप्रसाद आचार्यको इजलासले मानव बेचविखन तथा ओसापसार मुद्दाका अभियुक्त क्व्होलासोंथर गाउँपालिका–८, की २६ वर्षीया शान्ता गुरुङलाई उक्त कैद र जरिवानाको फैसला सजाय सुनाएको हो।

पीडकबाट जरिवाना र पीडितलाई क्षतिपूर्ति भराउन फैसला भएको स्रेस्तेदार शर्माले जानकारी दिए। उनका अनुसार मानव बेचविखन तथा ओसारपसार ऐन २०६४ को दफा १५ को उपदफा (१) को खण्ड (ख) बमोजिम गुरुङलाई कैद फैसला भएको हो।

पीडक महिला मुद्दा पुर्पक्षका लागि गत साउन २८ गतेदेखि कारागारमा रहेको पनि स्रेस्तेदार भूमिप्रसाद शर्माले जानकारी दिए। उनका अनुसार किशोरीलाई कुनै परपुरुषसँग लगाइदिने भनी ३ वर्षदेखि ललाईफकाई गर्दै आएको र पटक–पटक बेचबिखन गर्न भनी लाने गरेको जानकारी भएपछि किशोरीकी आमाले गत साउन २ गते प्रहरीमा उजुरी दिएपछि सो घट्नाको खुलासा भई मुद्दा चलेको थियो।

गत बैशाख ३० गते किशोरीलाई बेचबिखन गर्न भनी लैजान लागेको र किशोरीले आमालाई खबर गरेपछि प्रहरीमा उक्त घटना परेको थियो।

Related News

सम्बन्धित समाचार

hero news full width