भद्रपुर, १२ फागुन । झापाको भद्रपुर नगरपालिका–३ मा बौलाह कुकुरले टोकेर दुहुना गाईसहित डेढ दर्जनबढी पशु—चौपाय मरेका छन् ।

गोठमा बाँधिएका र चरनमा छाडिएका गाई, राँगा, बाछाबाछी, खसी र बाख्रालाई बौलाह कुकुरले टोकेपछि रेबिज लागेर मरेका हुन् ।

भद्रपुर—३ का सूर्यनगरका विसु मर्डीले पालेको कुकुर बौलाएपछि सन्थाल बस्तीमा सबैभन्दा बढी चौपाय मरेको भद्रपुर नगरपालिकाका पशु सेवा शाखाका प्राविधिक गणेश भट्टाराईले बताए ।

मङ्गलबारे क्षेत्रमा रेविजविरुद्धको खोप लगाउन सुरु गरिएको छ । पशु तथा मानिसलाई मर्नबाट बचाउन रेविजविरुद्धको खोप लगाउन सुरु गरिएको प्राविधिक भट्टाराईले बताए । सो क्षेत्रमा मानिस र चौपाय गरी १४ वटा रेबिज विरुद्धको खोप लगाइएको छ ।

भेटेरिनरी अस्पताल तथा पशु सेवा केन्द्रका प्रमुख डा पशुपति ढुङ्गानाले निःशुल्क खोप उपलब्ध गराएको बताए । कुनै पनि जनावर मार्न नपाइने अन्तराष्ट्रिय मान्यताका कारण कुकुरलाई बन्ध्याकरण गरी प्रजनन्दर घटाउन भद्रपुर नगरपालिकाले प्रत्येक वर्ष शिविर सञ्चालन गर्दै आएको छ ।

भद्रपुर नगरपालिकाका प्रमुख जीवनकुमार श्रेष्ठले सडकमा हिँड्ने कुकुरको बन्ध्याकरण गरी सङ्ख्या घटाए पनि घरपालुवा कुकुरलाई रेविज विरुद्धको खोप नलागाई पाल्ने हुँदा यस्तो समस्या आएको बताए ।