कुस्मा–बलेवा यान्त्रिक पुल बन्द

रासस
फागुन १२, २०७५
yantrik-pool


पर्वत, १२ फागुन । कुश्मा–बलेवा यान्त्रिक पुल मर्मत गर्न बन्द गरिएको छ । पुलमा डब्बा तान्न प्रयोग भएका मसिना लठ्ठाहरुमा समस्या देखिएपछि मर्मतका लागि सेवा बन्द गरिएको कुश्मा–बलेवा यान्त्रिक पुल लिमिटेडका अध्यक्ष होमनारायण श्रेष्ठले बताए ।

पर्वतको सदरमुकाम कुश्माबाट बागलुङ नगरपालिका–१४ बलेवासम्म जोडिएको उक्त पुलबाट दैनिक ५०० सर्वसाधारण आवातजावत गर्दै आएका छन् । पुलका डब्बा तान्न प्रयोग हुने मसिना लठ्ठा एक÷एक वर्षमा परिवर्तन गर्नुपर्ने भएकाले बन्द गरिएको हो ।

लठ्ठामा समस्या देखिएपछि जोखिम उठाउनुभन्दा बन्द गरेर मर्मत गर्न लागिएको पर्वत उद्योग वाणिज्य सङ्घका अध्यक्षसमेत रहेका सञ्चालक केदारनाथ शर्माले जानकारी दिए । पुल मर्मत गर्न कम्तीमा एक हप्ता लाग्ने अनुमान छ । भारतबाट सोमबारसम्ममा प्राविधिक आइपुग्ने र मर्मतको काम थाल्ने योजना रहेको छ ।

यान्त्रिक पुल बन्द हुँदा सर्वसाधारण एक घण्टाको घुमाउँरो बाटो यात्रा गरी बडागाउँ–कैया झोलुङ्गेपुलको प्रयोग गरी आवातजावत गर्न बाध्य भएका छन् । यो पुल दक्षिणी बागलुङका एक दर्जन गाउँका बासिन्दाले प्रयोग गर्दै आएका छन् । यो पुल कुश्मा–बलेवा यान्त्रिक पुल विसं २०६८ मा करीब चार करोडको लागतमा बनाइएको हो । एक डब्बामा एक पटकमा आठ गरी दुईमा १६ मानिस जाउआउ गर्दै आएका छन् ।

Related News

सम्बन्धित समाचार

hero news full width