डा ढुंगानालाई नीति तथा योजना आयोग सदस्यको नियुक्तिपत्र दिँदै मुख्यमन्त्री पृथ्वीसुब्बा गुरुङ। तस्वीर : प्रकाश ढकाल/आदर्श समाज

पोखरा, ६ फागुन। गण्डकी प्रदेशको नीति तथा योजना आयोगको सदस्यमा नियुक्त डा भीमा ढुंगानाले शपथ लिएकी छिन्।

मुख्यमन्त्री पृथ्वीसुब्बा गुरुङको उपस्थितिमा सोमबार आयोग उपाध्यक्ष डा गिरधारी शर्माले ढुंगानालाई शपथ गराएका हुन्। गत मंगलबारको मन्त्रिपरिषद् बैठकले ढुंगानालाई सदस्यमा नियुक्त गर्ने निर्णय गरेको थियो।

ढुंगानाको नियुक्तिसँगै आयोगको तीन सदस्यीय कमिटी पूरा भएको छ। गैंडाकोटकी ढुंगानाले जापानको विश्वविद्यालयबाट कृषि, अर्थशास्त्र तथा वातावरण विषयमा विद्यावारिधी उत्तीर्ण गरेकी छिन्।

कार्यक्रममा उनले प्रदेशको विकास र उन्नयनमा आफ्नो क्षमता पूर्ण उपयोग गर्ने प्रतिबद्धता जनाइन्। मुख्यमन्त्री गुरुङले पञ्चवर्षीय योजना निर्माणका साथै सरकारको वार्षिक बजेट, नीति तथा कार्यक्रम निर्माणमा पनि आयोगको भूमिका महत्वपूर्ण हुने बताए। प्रदेशको योजना तथा नीति निर्माण गर्दा राष्ट्रिय लक्ष्यभन्दा पनि माथिको लक्ष्य राखेर काम गर्नुपर्ने उनको भनाइ छ।

प्रमुख सचिव लक्ष्मीराम पौडेलले प्रदेशको आवश्यकता अनुसार काम गरेर संघीयताको सफल कार्यान्वयनमा सघाउन आग्रह गरे। प्रदेशका सबै मन्त्रीहरु, सचिवहरु तथा अन्य विभिन्न व्यक्तिहरुले ढुंगानालाई बधाई ज्ञापन गरेका थिए।