जनप्रतिनिधिविरुद्ध जनताको आक्रोश

आदर्श समाज सम्वाददाता
फागुन २, २०७५
9_Fotor
  • विकासका काममा कमिसनको चक्कर : उपभोक्ता समिति
  • समितिले उपभोक्तासँग मनपरी शुल्क उठायो : जनप्रतिनिधि

पोखरा, १ फागुन। विकास निर्माणमा अवरोध गरेको आरोप लगाउँदै पोखरा–५, धारापानीका नागरिक आफ्नै जनप्रतिनिधिसँग आक्रोशित भएका छन्। सीमानामार्ग–बाँसटारी–धारापानी सडक निर्माणमा जनप्रतिनिधिले अवरोध गरेर काम गर्न नदिएको उनीहरुको आरोप छ।

बाटो निर्माण उपभोक्ता समितिले बुधबार पत्रकार सम्मेलन गरी विकास निर्माणको काम गर्दा जनप्रतिनिधिले नै कमिसन मागेको गम्भीर आरोप लगाए। ‘५० प्रतिशत अनुदानमा काम गर्ने गरी महानगरले नै उपभोक्ता समिति बनायो। समिति बनेपछि हामीले काम गर्न थाल्यौं,’ समिति अध्यक्ष युवराज खतिवडाले भने, ‘तर अहिले अनावश्यक बखेडा झिकेर आयोजना नै बिथोल्ने काम भएको छ। दू्रतगतिमा भैरहेको काम रोक्नु आश्चर्यको कुरा हो। उनीहरुले मागेको कमिसन नदिएपछि उपभोक्ता समिति नै खारेज गरियो।’

गएको मंसिरमा वडाध्यक्ष धनबहादुर नेपाली र वडा सदस्य अञ्जु क्षेत्रीको रोहवरमा खतिवडाको अध्यक्षतामा सीमानामार्ग–बाँसटारी–धारापानी सडक उपभोक्ता समिति गठन गरिएको थियो। तर सरकारको नीतिविपरीत काम गरेको आरोप लगाउँदै मंगलबार बसेको वडा समितिको बैठकले खतिवडालाई उपभोक्ता समितिको अध्यक्षबाट हटाइएको छ।

खतिवडाले जनप्रतिनिधिले भनेझैं कमिसन दिन नसकेकै कारण विभिन्न बखेडा झिकेको आरोप लगाए। ‘सरकारले बनाउनुपर्ने बाटो जनताले आफैं बनाउन खोज्दा हौसला पो दिनुपर्छ। उल्टै विकासको काम रोक्नुको कारण के हो,’ उनले प्रश्न गरे, ‘प्राविधिकसँग मिलेर लागत बढाउने, अनि रकम कुम्ल्याउन नपाएर रोकिएको हैन ? धेरै योजनामा जनप्रतिनिधिले कमिसन लिएको उदाहरण हामीसँग छन्।’

उपभोक्ता समिति खारेज गरे पनि अहिले बनिरहेको बाटो पूरा गरेरै छोड्ने उनले बताए। ‘कसैले रोक्दैमा हामी विकासको काम रोक्ने पक्षमा छैनौं। कसैलाई कमाइ खाने भाँडो बनाउन बाटो निर्माण रोकिनेवाला छैन,’ खतिवडा भन्छन्, ‘महानगरले दिने भनेको बजेट नदिए पनि हामी आफै पैसा उठाएर काम गछौर्ं। जसरी पनि योजना सम्पन्न हुन्छ।’

महानगरपालिकाले बजेट विनियोजन गर्नुभन्दा पहिले नै उपभोक्ता समिति गठन गरेपछि बढी समस्या बल्झिएको जानकार बताउँछन्। करिब ६१ लाख रुपैयाँ लागत स्टिमेट गरिएको बाटोमा महानगरले बजेट नै बिनियोजन गरिसकेको छैन।

उपभोक्ता समिति गठन भएर काम अघि बढिसकेपछि प्रदेश सरकारले यो सडकमा ३५ लाख रुपैयाँ बजेट विनियोजन गरेको वडाध्यक्ष धनबहादुर नेपालीले जानकारी दिए। ‘लागत स्टिमेट निकालेर ५० प्रतिशत जनसहभागिता जुट्ने भएपछि काम शुरु भएको हो। जति लागे पनि महानगरले लगानी गर्छ,’ उनले भने, ‘वडाकै पहलमा प्रदेशले पनि बजेट छुट्याएको छ। महानगरले पनि अपुग भए अवस्था हेरेर लगानी गर्छ।’ त्यस ठाउँमा करिब ५ सय मिटर बाटो ढलान गरिने नेपालीले बताए।

अहिले चलिरहेको विषयमा चाहीँ उनले कमिसन लिएको भेटिए तत्काल कारबाही गर्ने बताए। ‘आरोप लगाएकै भरमा कारबाही गर्ने कुरा त भएन। कसैले कमिसन मागेको प्रमाण ल्याउँछ भने वडा सरकार तत्कालै एक्सनमा उत्रिन्छ,’ उनले भने, ‘मैले कमजोरी गरेको भए पनि कारबाही भोग्न तयार छु।’ खतिवडाले सार्वजनिक जग्गा मिचेर भौतिक संरचना निर्माण गरेपछि त्यसलाई हटाउन निदेर्शन गर्दा मिडियाबाजी गरेर सरकारविरुद्धमा उत्रिएको नेपालीको आरोप छ। महानगरविरुद्ध मुद्दा दायर गरेकोले उपभोक्ता समितिबाट पनि हटाइएको उनले बताए। विकासको काममा साझेदारी गर्छु भन्नेलाई स्वागत छ। तर महानगर र सरकारकै विरुद्ध अदालतमा मुद्दा मामिला गर्छ भने त्यसलाई सहेर बस्ने कुरा भएन नि,’ उनले अघि भने, ‘माघ ११ गते वडा र महानगरलाई विपक्षी बनाएर मुद्दा दायर गरेपछि कानूनी बाटो अपनाएको हो। अब खतिवडाजी उपभोक्ता समितिको अध्यक्ष रहनुभएन। हामी अर्कै समिति गठन गरेर काम अघि बढाउछौं।’

वडा सदस्य अञ्जु केसीले कमिसन खाएको कुरा सुन्दा आश्चर्य लागेको बताइन्। ‘घरमा कोही पनि नभएको बेला अस्तब्यस्त डोजर चलाइयो। जबरजस्ती घर र कम्पाउण्ड भत्काइयो। त्यो उजुरी अहिले पनि वडामा छ,’ उनले भनिन्, ‘जनसहभागिता नाममा प्रत्येक व्यक्तिसँग ठगी प्रवृत्तिले पैसा उठाएको भेटियो। पैसा नदिनेलाई धम्की दिएको रेकर्ड छ। यो अराजकता जनप्रतिनिधिले सहन सक्दैन। त्यसको विरोध गर्दा उल्टै कमिसन मागेको आरोप लगाइयो।’ खतिवडाले प्रत्येक व्यक्तिसँग ३ देखि ६ हजार रुपैयाँसम्म पैसा उठाएको आरोप लगाइन्।

खतिवडाले पोखराको पृथ्वीचोक, चिप्लेढुंगा र सिर्जनाचोकमा सस्तोबजार सञ्चालन गर्दै आएका छन् ।

Related News

सम्बन्धित समाचार

  • शिक्षासेवी कोइरालाको नाममा प्रतिष्ठान

    आदर्श समाज सम्वाददाता मंसिर २१, २०७९
    पोखरा । शिक्षासेवी हेरम्बप्रसाद कोइरालाको योगदान चिरस्थायी बनाउन हेरम्बप्रसाद÷पार्वती कोइराला शिक्षा प्रतिष्ठान–२०७९ घोषणा गरिएको छ । कोइराला दम्पतीको चौरासी पूजा…
  • निशुल्क स्वास्थ्य शिविर

    आदर्श समाज सम्वाददाता मंसिर २१, २०७९
    पोखरा । रोट्याक्ट क्लब अफ न्युरोड पोखरा, रोट्याक्ट क्लब अफ मणिपाल मेडिकल साइन्स र रोटरी क्लब अफ न्युरोड पोखराको संयुक्त…
  • महानगरकै नमुना सडक !

    आदर्श समाज सम्वाददाता मंसिर २१, २०७९
    लेखनाथ । पोखरा २६ स्थित प्रगतिटोलको सडक ढलान तथा नाला निर्माण योजनाको सोमबार वडाध्यक्ष नरेन्द्र थापाले शुभारम्भ गरेका छन् ।…
  • अन्तरविद्यालय चित्रकला

    आदर्श समाज सम्वाददाता मंसिर २१, २०७९
    पोखरा । सातौं पर्वतीय महोत्सवअन्तर्गत अन्तर्राष्ट्रिय पर्वतीय संग्रहालयमा अन्तरविद्यालयस्तरीय चित्रकला भएको छ । पर्वतीय महोत्सवको पूर्वसन्ध्यामा नेपाल पर्वतारोहण संघ र…
  • लैंगिक हिंसाविरुद्ध सचेतना र्‍याली

    आदर्श समाज सम्वाददाता मंसिर २१, २०७९
    पोखरा । सामुदायिक वन उपभोक्ता महासंघ नेपालले लैंगिक हिंसा न्यूनीकरणका लागि राष्ट्रव्यापी रुपमा १६ दिने अभियान सञ्चालन गरेको छ ।…

hero news full width