पोखरा, १० माघ । सुनसरीको ऐतिहासिक वराहक्षेत्रस्थित चतराधाममा महायोगी सिद्धबाबा वैष्णव कृष्णदासजी महाराजको सत्सङ्कल्पमा राम तारक ब्रम्ह महायज्ञ माघ २७ गतेदेखि हुने भएको छ।

महायज्ञ राष्ट्रपति विद्यादेवी भण्डारीले उद्घाटन गर्ने कार्यक्रम रहेको जगत्गुरु श्रीरामानन्दाचार्य सेवा पीठ सिद्ध महायोग ध्यान केन्द्र पोखराका अध्यक्ष भोला बरालले जानकारी दिए।

साथै राष्ट्रपति भण्डारीद्वारा माघ २६ गते महायोगी सिद्धबाबा वैष्णव कृष्णदासजी महाराजबाट दीक्षित साधक साधिकाको करिब ८ करोडको लागतमा जगत्गुरु श्रीरामानन्दाचार्य सेवा पीठ परिसर, वराहक्षेत्र धाममा निर्माण गरिएको सुविधासम्पन्न एक सय २६ कोठाको आवास गृहको समेत उद्घाटन गर्ने कार्यक्रम छ । सो आवासको क्षमता २ हजार ५ सय रहेको छ।

महायज्ञमा देश विदेशमा रहेका १२ सय साधक साधिकाहरुले एक अर्ब ६० करोडको मन्त्र जप अनुष्ठान गरिरहेका पनि बरालले जनाए । महायज्ञमा देशविदेशबाट आउने सन्तमहात्मा एवम् जगत्गुरुहरुको दीव्य समागमका साथै अन्य क्षेत्रका व्यक्तित्वहरुको समेत उपस्थिति रहने भएकोले आत्मिक भौतिक लाभ प्रदान हुने सो महायज्ञमा सहभागी हुन महायोगी सिद्धबाबा आध्यात्मिक प्रतिष्ठानका वरिष्ठ उपाध्यक्ष गोविन्दबाबु तिवारी आग्रह गरेका छन्।