खैरेनीटार, २ माघ। खैरेनी माध्यमिक विद्यालय, शुक्लागण्डकीको स्वर्ण महोत्सव तथा अभिभावक दिवस सम्पन्न भएको छ ।

स्वर्ण महोत्सवको अवसरमा विद्यालयले निःशुल्क स्वास्थ्य शिविर सञ्चालन गरेको थियो। कालिमा स्वास्थ्य क्लिनिक खैरेनीटारले प्राविधिक सहयोग पुर्याएको कार्यक्रममा १ सय ४० जनाको स्वास्थ्य जाँच गरिएको थियो । यस्तै, शुक्लागण्डकी नगरस्तरीय आधारभूत तह हाजिरीजवाफ प्रतियोगिता सञ्चालन गरिएको थियो। १०  विद्यालयको सहभागिता रहेको प्रतियोगितामा खैरेनी मावि ‘बी’ प्रथम, खैरेनी मावि समूह ‘ए’ दोस्रो, जनकल्याण माविको समूह तेस्रो भए ।

विद्यालय व्यवस्थापन समिति अध्यक्ष कृष्णबहादुर पौडेलको अध्यक्षता रहेको कार्यक्रमको सञ्चालन शिक्षक विष्णुहरि तिम्सिना, दीपक भण्डारी, राजेन्द्र तिम्सिना र सुरजकुमार श्रेष्ठले गरेका थिए।

कार्यक्रअघि विद्यालयले प्रभातफेरी गरेको थियो । प्रभातफेरीमा विद्यार्थी, शिक्षक, अभिभावक, वर्तमान तथा पूर्व विद्यालय व्यवस्थापन समिति, शिक्षक अभिभावक संघ, स्थानीय समाजसेवी लगायतको सहभागिता थियो ।

प्रभातफेरीमा विद्यालय व्यवस्थापन समिति अध्यक्ष कृष्णबहादुर पौडेल, शिक्षक अभिभावक संघका अध्यक्ष कमलमोहन घिमिरे, प्रधानाध्यापक केशवराज घिमिरे, सहायक प्रधानाध्यापक राचन्द्र बगाले लगायतले सम्बोधन गरेका थिए ।