पोखरा, २५ पुस। पोखरा–२२, पुम्दीभुम्दीस्थित शुक्रराज माविको स्वर्ण महोत्सव सफल पार्न विदेशबाट समेत आर्थिक सहयोग आउने गरेको छ ।

विद्यालयले वर्षभरि नै स्वर्ण महोत्सव मनाउँदैगरेको सन्दर्भमा करिब २० लाख खर्च लाग्ने भए पनि हालसम्म १२ लाख रुपैयाँ आर्थिक संकलन भएको र थप रकम सहयोग आउनेक्रम जारी रहेको विद्यालयका प्राचार्य नरनाथ बरालले बताए।

शहीद शुक्रराज शास्त्रीको स्मृतिमा निर्मित सो विद्यालय ५० वर्ष पुगेको अवसरमा शुक्रराजको शालिक समेत निर्माण गरिने बरालले जनाए। त्यसैगरी स्वागतद्वार तथा स्मारक निर्माण, स्मारिका प्रकाशन लगायत कार्यक्रम गरिने भएको छ। विद्यालयलाई पूर्व उपप्रधानपञ्च पार्दी बिरौटा निवासी सिंहबहादुर गुरुङबाट १ लाख १ हजार, गेमबहादुर गुरुङबाट १ लाख १ हजार, भानवीर गुरुङ स्मृतिमा जसकुमारी गुरुङबाट १ लाख १ हजार, डिम्मरसिंह गुरुङबाट १ लाख ५ सय, पूर्व विद्यार्थी टेकबहादुर गुरुङबाट ५० हजार, पूर्व शिक्षक कालावाङ घडेरी (हाल बेल्जियम) बस्ने पम्फा गुरुङबाट ४ लाख आर्थिक सहयोग प्राप्त भएको प्राचार्य बरालले बताए।

स्वर्ण महोत्सवअन्तर्गत अन्तरविद्यालयस्तरीय वक्तृत्वकला, सेभेन ए साइड छात्र फुटबल, छात्र भलिबल, निबन्ध प्रतियोगिता हुनेछ।

नर्सरीदेखि १० कक्षासम्म अंग्रेजी माध्यमबाट पढाइ हुने सो विद्यालयमा प्लस टुमा व्यवस्थापन र शिक्षा संकाय गरी करिब ४ सय जना विद्यार्थी अध्ययनरत् रहेको विद्यालय व्यवस्थापन समिति अध्यक्ष समेत रहेका प्रदेश सांसद राम्जी बरालले बताए। स्वर्ण महोत्सवको विशेष कार्यक्रम माघ १४ देखि १६ गतेसम्म हुँदैछ।