पोखरा, १९ पुस। पृथ्वीनारायण क्याम्पस (पीएन) मा यसै शैक्षिक सत्रदेखि रसायनशास्त्र विषयमा स्नातकोत्तर तहको पढाइ सञ्चालन हुने भएको छ।

उक्त कार्यव्रmम सञ्चालन गर्न पेश गरिएको प्रस्ताव त्रिभुवन विश्वविद्यालय प्राज्ञिक परिषद्बाट स्वीकृत भएपछि क्याम्पसमा सो तहको पढाइ संचालन हुन लागेको हो।

गण्डकी प्रदेशको आवश्यकता मध्यनजर गरी रसायनशास्त्र विषयमा स्नातकोत्तर तहको पढाइ सञ्चालन गर्न लागेको क्याम्पसले जनाएको छ।

यस क्याम्पसमा क्रमिक रूपमा विज्ञानका विषयहरुमा स्नातकोत्तर तहको पढाइ सञ्चालन गर्न आवश्यक रहेको रसायनशास्त्रका विभागीय प्रमुख प्राडा अक्कलदेव मिश्रले बताए।

सो तहको पढाइले यस क्याम्पस र समग्रमा विश्वविद्यालयको वैज्ञानिक शिक्षा सबलीकरण र सुदृढीकरणमा टेवा पुर्याउने उनको विश्वास छ।

२०१७ सालमा स्थापित यस क्याम्पसमा २०२४ सालदेखि विज्ञान संकायमा प्रमाणपत्र तहको कक्षा सञ्चालन भएको थियो। समयसापेक्ष विद्यार्थी तथा अभिभावकहरुको चाहना अनुरूप २०४४ मा विज्ञानमा स्नातक तहको पढाइ शुरु भएको थियो।

२०६४ सालमा भौतिकशास्त्रमा पहिलो पटक स्नातकोत्तर तहको कक्षा सञ्चालन भएको थियो। विज्ञानका अन्य विषयहरुमा अहिलेसम्म स्नातक तहको पढाइ मात्रै हुने गरेको छ।

यस क्याम्पसमा ३२ वटा विभागहरु, २० वटा विषयमा स्नातकोत्तर तहको पढाइ र झण्डै पाँच सय वटा विषयहरुको पठनपाठन हुँदै आएको छ।

गुणस्तरीय शैक्षिक जनशक्ति उत्पादन गर्ने गरेकै कारणले यो क्याम्पस २०७५ मा नेपाल सरकार शिक्षा मन्त्रालयबाट उत्कृष्ट क्याम्पसका रुपमा घोषित भएको छ।

हालै विश्वविद्यालय अनुदान आयोगबाट गुणस्तर निर्धारण तथा प्रत्यायोजन (क्यूएए) समेतको उपाधि पाएको छ।

क्याम्पसमा झण्डै १० हजार विद्यार्थी, पाँच सय प्राध्यापक र एक सय ५० कर्मचारी छन्।