पोखरा, २४ मंसिर  । गण्डकी विकास बैंकले बाँकेको कोहलपुरमा शाखा विस्तार गरेको छ ।

कोहलपुर नगरपालिकाका मेयर लुटबहादुर रावतले शाखा उद्घाटन गर्दै बैंक ग्रामीण क्षेत्रका जनताको सहयोगी बन्न सकोस् भनी शुभकामना दिए ।

कार्यक्रममा नेपाल राष्ट्र बैंक नेपालगञ्ज शाखाका उपनिर्देशक नारायणप्रसाद पोख्रेल, कोहलपुर-११ का वडाध्यक्ष कर्णबहादुर थापा र उद्योग वाणिज्य संघ कोहलपुर अध्यक्ष चक्र अधिकारीले शुभकामना मन्तव्य व्यक्त गरे ।

बैंक सञ्चालक कृष्णबहादुर थापा क्षत्रीको अध्यक्षतामा भएको सो कार्यक्रममा बैंकका प्रमुख कार्यकारी अधिकृत रेशमबहादुर थापाले बैंकले प्रदान गर्ने सेवासुविधा एवं बैंक गतिविधिबारे जानकारी गराए ।

बैंकले केन्द्रीय कार्यालयसहित विभिन्न ७७ वटा शाखा कार्यालयमार्फत आकर्षक व्याजदरमा विभिन्न निक्षेप योजना, सहज र सरल रुपमा कर्जा योजना साथमा एबीबीएस, एटिएम, सी-आस्वा, आइपीएस, मोवाइल बैकिङ सेवा, लकर सेवा, सुनधितोमा कर्जा सुविधा, रेमिट्यान्स सेवा, प्रधानकार्यालय लगायत केही शाखाबाट ३६५ दिने बैकिङ सेवा तथा सन्ध्याकालीन सेवा पनि प्रदान गर्दै अएको छ । साथै न्यून आय भएका व्यक्तिलाई विपन्नवर्ग कर्जा तथा समूहमा आवद्घ लघुवित्त कर्जा पनि प्रदान गर्दै आएको बैंकका प्रमुख कार्यकारी अधिकृत रेशमबहादुर थापाले जनाए ।

बैंकले चालु आवको प्रथम त्रैमासमा संचालन मुनाफा १५ करोड ३० लाख रुपैयाँ आर्जन गर्न सफल भएको छ भने सो अवधिसम्म निक्षेप २३ अर्ब ७२ करोड र कर्जा २१ अर्ब २४ करोड रुपैयाँ पुर्‍याएको छ । बैंकको निष्कृय कर्जा मात्रा न्यून छ ।