पोखरा, ९ मङ्सिर । ४३ जना ज्येष्ठ नागरिकहरुले पोखरामा आइतबार आफ्नो स्वास्थ्य परीक्षण गराएका छन् । फेवा सिटी हस्पिटलको प्राविधिक सहयोगमा आमा मिलन केन्द्र, ज्येष्ठ नागरिक परिचालन तथा व्यवस्थापन समितिले स्वास्थ्य परीक्षणको कार्यक्रम आयोजना गरेको हो ।

संस्थाको नियमित कार्यक्रमअन्तरगत ज्येष्ठ नागरिकहरुलाई लागि मधुमेह, रक्तचाप र अन्य रोगहरुको निःशुल्क स्वास्थ्य परीक्षणलगायत प्रयोगशालाको सेवा, सुविधा उपलब्ध गराइएको कार्यक्रम संयोजक निर्मला घिमिरेले बताइन् ।

प्रमुख अतिथि तथा फेवा सिटी हस्पिटलका प्रमुख व्यवस्थापक त्रिभुवन पराजुलीले ज्येष्ठ नागरिकहरुको पहिचान, परिचयात्मक तथा स्वास्थ्य परीक्षण कार्यक्रमको उद्घाटन गरेका हुन् । कार्यक्रममा बोल्दै पराजुलीले अग्रसर आमा मिलन केन्द्रले अभिभावकसरहका ज्येष्ठ नागरिकप्रति देखाएको सम्मान र सहयोगको प्रशंसा गरे । पराजुलीले आमा मिलन केन्द्रले गर्ने जुनसुकै सामाजिक कार्यमा हस्पिटलको सहयोग रहने प्रतिबद्धता जनाए ।

कार्यक्रममा समाजसेवी रामप्रसाद घिमिरे, शिक्षासेवी त्रिभुवन पौडेल, संस्थाका सल्लाहकार ध्रुवराज पौडेल र ज्येष्ठ नागरिक दामोदर गौतमलगायतले आफ्ना धारणा राखेका थिए ।

आमा मिलन केन्द्र, ज्येष्ठ नागरिक परिचालन तथा व्यवस्थापन समितिकी संयोजक निर्मला घिमिरेको अध्यक्षतामा भएको कार्यक्रममा संस्थाकी संरक्षक इन्दिरा पौडेलले स्वागत तथा कार्यक्रममाथि प्रकाश र समितिका सह-संयोजक शेषबहादुर थापाले कार्यक्रम संचालन गरेका थिए ।