काठमाडौँ, २ मंसिर। प्रमुख प्रतिपक्षी दल नेपाली काँग्रेसले भ्रातृ संस्था नेपाल विद्यार्थी संघको विधान स्वीकृत गरेसँगै संघको केन्द्रीय कार्यसमितिको समयावधि दुर्इ महिना थप भएको छ।

पार्टिकेन्द्रीय कार्यालय सानेपामा आइतबार बसेको काँग्रेस केन्द्रीय कार्यसमिति बैठकले संघको विधानलाई परिमार्जनसहित स्वीकृत गरेको पार्टिप्रवक्ता विश्वप्रकाश शर्माले जनाए। नेविसंघको विधानअनुसार वर्तमान केन्द्रीय समितिको कार्यकाल आइतबारसम्म थियो। २०७३ भदौ २ गते दुर्इवर्षे कार्यकालका लागि निर्वाचित वर्तमान केन्द्रीय समितिले त्यसयता थप गरिएको ३ महिनाको अवधिमासमेत महाधिवेशन गर्न सकेको थिएन। नेविसंघको विधानमा विशेष परिस्थितिमा तीन महीना थप गर्न सकिने व्यवस्था थियो। काँग्रेस बैठकले तीन महीना थप गर्न सकिने प्रावधानको सट्टा पाँच महीना थप गर्न सकिने प्रावधानसहितको विधानलाई स्वीकृत गरेको प्रवक्ता शर्माले बताए ।