पोखरा, २ मंसिर। ‘फेवाताललाई बचाऔं, भावी सन्ततीको नासोलाई जोगाऔं’ भन्ने मूलनाराका साथ खहरे आमा समूहले ९१ औं हप्ताको फेवाताल सरसफाइ गरेको छ।

यसपटक खहरे फनपार्कदेखि स्वीमिङपुलसम्म सरसफाइ गरिएको थियो। सरसफाइका लागि लायन्स क्लब अफ पोखरा अञ्जलीकी अध्यक्ष सान्त्वना पराजुलीले खहरे आमा समूहकी अध्यक्ष मैया थापा भट्टराईलाई बाल्टिन, पञ्जा र फोहोर उठाउने प्लाष्टिक हस्तान्तरण गरेकी थिइन्।

सरसफाइमा बेलायतका नागरिक एलेन र जनपूरका सामाजिक अभियन्ता वैद्यनाथ शाहको टोलीले पनि सहभागिता जनाएको थियो।कार्यक्रममा पोखरा ६ का वडासदस्य विष्णु भट्टराई, लायन्स क्लब अफ पोखरा अञ्जलीकी अध्यक्ष सान्त्वना पराजुलीले बोलेका थिए।

खहरे आमा समूहकी अध्यक्ष मैयाँ थापा भट्टराईको अध्यक्षतामा भएको कार्यक्रम सचिव पम्फा थापाले संचालन गरेकी थिइन्।