लेखनाथ, १६ असोज। एलआईसी नेपालले पोखरा-३२, तल्लो गगनगौंडाका टंकबहादुर गुरुङको परिवारलाई बिमावापत मृत्यु दाबी रकम हस्तान्तरण गरेको छ। २०७० सालमा आफ्नो बिमा गराएका गुरुङको यस वर्षको असारमा मृत्यु भएको थियो।

पतिको निधनपछि एक्लोपन महसुस गरेकी तीलकुमारी गुरुङलाई एलआईसीका प्रतिनिधिले घरमै गएर मृत्यु दाबीवापत १३ लाख रुपैयाँ बराबरको चेक दिँदा उनले गहभरी आँसु झारिन्। उनी अतिततिर फर्किन् र भनिन्, ‘बिमा मेरो सहारा भयो। यो रकम छोराछोरीको शिक्षादीक्षाको लागि खर्च गर्छु’ उनका पति टंकबहादुरले १० लाख बराबरको बिमा गरेका थिए। उनको निधन हुँदासम्म चौथो किस्ता बुझाएका थिए।

एलआईसी नेपाल, पोखरा शाखा प्रमुख गिरिराज घिमिरे, वरिष्ठ एजेन्सी म्यानेजर केदारनाथ अधिकारी, बिमा अभिकर्ता संघ एलआईसी पोखरा शाखाका अध्यक्ष रामप्रसाद आचार्य र अभिकर्ता बलबहादुर श्रेष्ठले तीलकुमारीलाई संयुक्त रुपमा रकम बुझाएका हुन्।