एलजी, माछापुच्छे्र, तारा र विष्णुपादुका सेमीमा

आदर्श समाज सम्वाददाता
असाेज १२, २०७५
kiran

पोखरा, ११ असोज। शीतलज्योति युवा क्लबको आयोजनामा जारी दोश्रो स्व. किरण खड्का स्मृति सेभेन ए साइड फुटबल प्रतियोगितामा एलजी एशोसिएसन रेड, माछापुच्छ्रे -एम)-१२, तारा एफसी र विष्णुपादुका ‘ए’ अन्तिम चारमा प्रवेश गरेका छन् ।

सेमिमा एलजीले माछापुच्छ्रे तथा तारा एफसीले विष्णुपादुकाको सामना गर्नेछन् । शुक्रबार नै सेमिफाइनल र फाइनल हुँदैछ ।

विहीवारको खेलमा एलजीले आदर्श युवा क्लबलाई २-० गोलले पराजित गरेको हो । जितका लागि रमेश मगर र सूर्यमान मगरले १-१ गोल गरे।

दोश्रो क्वाटरफाइनलमा माछापुच्छ्रेले संगम एफसीलाई ३-० गोलले पाखा लगाउँदै सेमीफाइनल प्रवेश गरेको हो। जितमा सुनिल घोतानेले २ र अविनाश तामाङले १ गोल गरे।

तारा एफसीले रञ्जन मेमोरियललाई २-० गोलअन्तरले पराजित गर्‍यो। ताराका लागि सुनिल बिक र विनोद गुरुङले गोल गरेका हुन् ।

अर्को क्वाटरफाइनलमा विष्णुपादुकाले दोब्रे एफसीलाई ४-० गोलले पराजित गरेको छ। टिमलाई सेमीफाइनलमा पुर्‍याउन समीर कार्कीले हृयाटि्रक पूरा गर्दा अजय श्रेष्ठले एक गोल गरे।

विजेताले १ लाख ५० हजार, उपविजेताले ८० हजार साथमा शिल्ड, मेडल र प्रमाणपत्र पाउने छन् ।

उत्कृष्ट खेलाडीलाई माउण्टेन वाइक तथा विधागत पुरस्कारमा जनही ५ हजार रुपैयाँ दिइनेछ । प्रतियोगिताको मुख्य प्रायोजक माटेपानी-१२ हङकङ परिवार र माटेपानी यूथ एशोसियसन यूके हो । क्लबका पूर्व खेलाडी किरण खड्काको स्मृतिमा उनको परिवारजनबाट ५ लाखको अक्षयकोष स्थापना गरी हरेक वर्ष प्रतियोगिता आयोजना हुँदैआएको छ ।

Related News

सम्बन्धित समाचार

hero news full width