पोखरा, २१ साउन। पोखरा महानगरपालिका वडा ४ स्थित नवीन माध्यामिक विद्यालयमा अक्षयकोष स्थापना गरिएको छ।

पोखरा ४, सिर्द्धार्थचोकका कमलराज लामिछानेले बुबा पुष्पराज लामिछाने र आमा रत्नकुमारी लामिछानेको पुण्यतिथिमा १ लाख ११ हजार १ सय ११ रुपैयाँको पुष्परत्न अक्षयकोष स्थापना गरेका हुन्।

वडाध्यक्ष शंकरप्रसाद बास्तोलाको उपस्थितीमा लामिछाने र उनकी धर्मपत्नी निर्मला लामिछानेले सोमबार विद्यालयका प्रअ शिरोमणि लामिछानेलाई सो रकम बराबरको चेक हस्तान्तरण गरे।

वडाध्यक्ष बास्तोलाले लामिछाने परिवारले परोपकार काम गर्दै आएको र वडामा एकमात्र सामुदायिक विद्यालय रहेकोमा प्राथमिकता दिएर अक्षयकोष स्थापना गरेकोमा धन्यवाद दिए। अक्षयकोषबाट आउने रकमले विद्यालयमा अध्यनरत जेहेन्दार विद्यार्थीलाई स्टेशनरी सामाग्री र छात्रवृत्ति प्रदान गरिनेछ।

प्रअ लामिछानेले सो अक्षयकोषबाट विद्यार्थीको मनोवल बढ्ने बताउँदै अक्षयकोष स्थापनामा सघाउनेलाई धन्यवाद दिए।