क्षयरोग निवारण संस्थाको साधारणसभा

आदर्श समाज सम्वाददाता
श्रावण २०, २०७५
tb

पोखरा, १९ साउन। नेपाल क्षयरोग निवारण संस्था कास्कीको ३८ औं साधारणसभा सम्पन्न भएको छ। संस्थाका केन्द्रीय महासचिव मदनकाजी श्रेष्ठले साधारणसभा उद्घाटन गर्दै क्षयरोगबारे सचेतना अभिवृद्धिको कार्यक्रममा संस्थाको ३७ जिल्ला शाखामध्ये कास्की शाखाले उल्लेखनीय कार्य गरेको बताए।

सरकारले क्षयरोगसम्बन्धी जनतासम्म पुर्‍याउने सेवा र कार्यक्रमबारे जनचेतना अभिवृद्धिका लागि संस्थाले सहजीकरण गर्ने महासचिव श्रेष्ठको भनाइ थियो।

पोखरा ११ का कावा अध्यक्ष जंगबहादुर हमाल ठकुरीले क्षयरोग नियन्त्रण सम्बन्धमा वडाभित्र हुने हरेका कार्यक्रममा वडा कार्यलयले सहयोग गर्ने प्रतिबद्धता जनाए।

सम्मानित एवं संस्थाका उपसभापति माधवप्रसाद पराजुलीले क्षयरोगबाट आम सर्वसाधारणलाई टाढै राख्न जनचेतना अभिवृद्धि गर्नुपर्ने औंल्याए।

संस्थापक सभापति डा नन्द श्रेष्ठले संस्थालाई जीवन्त बनाइराख्नुपर्नेमा जोड दिए। संस्थालाई आर्थिक रुपमा सवलीकरण गर्न अक्षयकोष स्थापना गर्नुपर्नेमा उनको जोड थियो।

केन्द्रीय सदस्य हीरादेवी शर्माले समुदायमा आधारित कार्यक्रम गरेकोमा कास्की शाखाको प्रशंसा गरिन्। पूर्व सदस्य रामचन्द्र थापाले आर्थिक अभावका कारण पनि संस्थाले स्वयंसेवी रुपमा समाजमा क्षयरोगसम्बन्धी जनचेतना अभिवृद्धि गरेको बताए।

सचिव गणेशबहादुर ढकाल प्रगति र कोषाध्यक्ष पूर्ण रानामगरको आर्थिक प्रतिवेदन साधारणसभाले अनुमोदन गरेको थियो। कार्यक्रममा संस्थाका उपसभापति माधवप्रसाद पराजुली, सचिव गणेशबहादुर ढकाल, संस्थापक सभापति डा नन्द श्रेष्ठ, संस्थापक सदस्य कृष्णबहादुर श्रेष्ठ, आजीवन सदस्य राधादेवी बास्तोला र हाजी नसिरुद्दीन मियाँलाई दोसल्ला ओढाएर सम्मानपत्रद्वारा सम्मान गरिएको थियो।

संस्थाका सभापति केशवराज भण्डारीको अध्यक्षतामा भएको कार्यक्रममा उपसभापति माधवप्रसाद पराजुलीले स्वागत र सचिव गणेशबहादुर ढकालले संचालन गरेका थिए।

Related News

सम्बन्धित समाचार

hero news full width