पोखरा, ३ साउन । लिटिल स्टेप माविमा विहीबार अभिमुखीकरण कार्यक्रम भएको छ ।

विद्यालय संस्थापक निर्देशक शेरबहादुर गुरुङको अध्यक्षतामा भएको कार्यक्रममा प्रमुख अतिथि भीमलाल गुरुङले गुणस्तरीय शिक्षा प्रदान गर्ने क्रममा विद्यालयलेे ३६ वर्षसम्म पुर्‍याएको योगदानको प्रशंसा गरे ।

पञ्चकोशी आर्थर डाँडाखर्क समाजका अध्यक्ष लालप्रसाद गुरुङले विद्यालयले नेपालमै अन्तर्राष्ट्रिय स्तरको शिक्षा प्रदान गर्दै आएको बताए ।

अभिभावक टेकप्रसाद भण्डारीले गुणस्तरीय शिक्षा प्रदान गर्नका लागि विद्यालय, विद्यार्थी तथा अभिभावक तिनै पक्षको महत्व हुने बतँए ।

नवआगन्तुक विद्यार्थी मीरा दोर्जे , कक्षा १२ का विद्यार्थी प्रशान्त गुरुङले मन्तव्य राखेका थिए।विद्यालय संस्थापक प्राचार्य पम्फा गुरुङले विद्यालयको चिनारी दिँदै विद्यालयमा परिचालन गर्नुपर्ने आचारसंहिताको बारेमा जानकारी दिइन् । संयोजक विनोद गिरीले स्वागत मन्तव्य राखेका थिए ।

यसैबीच, विद्यालयले सामाजिक उत्तरदायित्वस्वरुप रोटरी क्लब अफ पोखरा लेकसाइडलाई ५० हजार रुपैयाँ प्रदान गरेको छ । सो रकम क्लब अध्यक्ष जयराम पौडेलले ग्रहण गरे ।

यस्तै, पत्रकारिता तथा समासेवामा समर्पित राजबहादुर गुरुङलाई २५ हजार रुपैयाँ सहित सम्मान गरियो ।

कार्यक्रममा बोल्दै पत्रकार गुरुङ तथा रोटरी अध्यक्ष पौडेलले विद्यालयको अझ प्रगतिको कामना गर्दै सहयोगप्रति आभार प्रकट गरे ।कार्यक्रममा विभिन्न सांस्कृतिक कार्यक्रमसमेत प्रस्तुत गरिएको थियो।