पोखरा, ३० असार । बैंकबाट कर्जा लिएका एक ग्राहकको असामयिक निधन भएपछि मुक्तिनाथ विकास बैंकले कर्जा मिनाहा गर्नुका साथै काजक्रिया खर्चवापत मृतक परिवारलाई रकम प्रदान गरेको छ ।

बैंकको लघुबित्त डेस्क कार्यालय, पृथ्वीचोकबाट लघुकर्जाअन्तर्गत कर्जा लिएकी पर्वत माझफाँट १ घर भई हाल पोखराको मासबार बस्ने सावित्रीकुमारी थापामगरको असामयिक निधन भएपछि बैंकले सो सहयोग गरेको हेा ।

क्षेत्रीय कार्यालय पोखराका प्रमुख बाबुराम ढकालले एक कार्यक्रमबीच मृतकका छोरालाई काजक्रिया खर्चबापत तत्काल ५ हजार रुपैयाँ हस्तान्तरण गरेका हुन् । साथै उनले बैंकलाई तिर्न बाँकी साँवा तथा ब्याज ९९ हजार १ सय ३३ रुपैयाँ कर्जा रकम मिनाहा गरिएको जानकारी गराए ।

कार्यकममा मुक्तिनाथ विकास बैंक लघुबित्त शाखा पृथ्वीचोकका शाखा प्रमुख मनोज भारती, क्षेत्रीय कार्यालयका वरिष्ठ अधिकृत प्रमोद ढकाल, बैंकका कर्मचारी, आफन्तजन तथा समूहका सदस्यको उपस्थिति थियो।