पोखरा, ६ असार । ३२ औं अन्तर्राष्ट्रिय एसओएस दिवस हप्ताव्यापी मनाउनेक्रममा एसओएस बालग्राम नेपालले तनहुँको दुलेगौँडा, जाम्पालिङस्थित लोडिक वृद्घाश्रममा उपहार वितरण तथा सरसफाइ कार्यक्रम गरेको छ ।

मंगलबार संस्थाका गण्डकीका योजना निर्देशक भगतकुमार श्रेष्ठको प्रमुख आतिथ्यमा सो कार्यक्रम भएको हो ।

कार्यक्रममा बालग्रामका कर्मचारीहरु, आमाहरु, बाल क्लब, युवा क्लब पदाधिकारी तथा एसओएस हर्मन माइनर विद्यालय पोखराका स्कूल लिडरहरुको सहभागिता थियो।

सोक्रममा वृद्घाश्रमका शौचालयदेखि प्रत्येक कोठा तथा परिसर वरपर पनि सरसफाइ गरिएको थियो।

कार्यक्रममा पोखरा बाल क्लबका अध्यक्ष ढुन्डुप छिरिङले वृद्घ आमाबाबाको नङ काट्ने, कपाल काट्ने लगायत शारीरिक सरसफाइमा सहयोग गर्दै उनीसँग कुराकानी गर्न र उपहार दिन पाएकोमा ज्यादै खुसी लागेको बताए।

एसओएस बालग्राम पोखराका योजना निर्देशक लोब्सङ ग्याल्छेनले एसओएस बालग्रामका संस्थापक पिता डा हर्मन माइनरको जन्म दिन जुन २३ का दिन प्रत्येक वर्ष विश्वका १ सय ३४ मुलुकमा जन्मजयन्तीका रुपमा एसओएस दिवस मनाइने गरिन्छ ।

एसओएस बालग्राम पोखराले पनि सप्ताहव्यापी कार्यक्रम अनुसार बालबालिका र युवालाई सामाजिकीकरण प्रक्रियामा सहयोग पुगोस् भन्ने हेतुले सो कार्यक्रम गरेको जनाइएको छ ।