पोखरा, २८ जेठ। पोखरामा जेठ ३० देखि असार २ गतेसम्म हुन लागेको महिला उद्यमी मेला-२०७५ तयारी पूरा भएको छ।

‘आर्थिक समृद्विका लागि महिला उद्यमशीलता’ भन्ने मूलनाराका साथ पोखरा उद्योग वाणिज्य संघ महिला उद्यमी विकास उपसमितिले मेला आयोजना गर्न लागेको हो। मेला पोखरा नयाँबजारस्थित प्रदर्शनी केन्द्रमा हुनेछ।

‘मेला तयारी पूरा भएको छ,’ सोमबार आयोजित पत्रकार सम्मेलनमा महिला उद्यमी मेला संयोजक सीता बरालले भनिन्-‘मेला सफल बनाउन सवैको सहयोग अपेक्षा गरेका छौं।’

महिला उद्यमशीलता प्रवर्द्वन गर्ने, महिलाद्वारा उत्पादित वस्तु बजारीकरण गर्ने, महिला उद्यमीलाई कर, लेभलिङ्ग, प्याकेजिङ्गका बारेमा सक्षम बनाउने उदेश्यले मेला आयोजना गर्न लागिएको हो।

मेलामा महिला उद्यमीद्वारा उत्पादित सामग्रीका ७० भन्दा बढि स्टल रहने छन्। मेलामा महिला उद्यमशीलताको अवस्था, चुनौती, सम्भावना र दायित्वबारे छलफल गरिनुको साथै महिलालाई उत्प्रेरणा गर्न सेमिनार गरिने छ।

त्यस्तै, मेलामा बैकिङ साक्षरता, कर शिक्षा, आँखा शिविर र महिलाको स्तन तथा पाठेघरको क्यान्सर परीक्षण पनि गरिने छ।

मेलामा प्रवेश निःशुल्क छ। मेला सम्पन्न गर्न करिब १५ लाख रुपैयाँ खर्च लाग्ने अनुमान गरिएको छ। पत्रकार सम्मेलन पोखरा उद्योग वाणिज्य संघका अध्यक्ष विश्वशंकर पालिखेको अध्यक्षतामा भएको थियो।