लेखनाथ, १७ जेठ ।धुम्रपान तथा सुर्तीजन्य पदार्थको सेवनले स्वास्थ्यमा पार्ने असरबारे जनचेतना फैलाउने उद्देश्यले पोखरा लेखनाथ-१४ मा रहेको सेन्ट फ्रान्सिस विद्यालयले विहिवार विभिन्न ठाउँमा सडक नाटकसहित सचेतनामूलक र्‍याली निकालेका छन् ।

विद्यालयको आयोजना, शिक्षकहरुको ब्यवस्थापन र विद्यार्थीहरुको सहभागितामा पोखरा लेखनाथ महानगरपालिका अन्तरगत लेकसाईड, बगर, चिप्लेढुङा र लेखनाथ नगर क्षेत्रको विजयपुरदेखि तालचोकसम्म धुम्रपानका असर र यसले स्वास्थ्यमा पार्ने प्रभावबारे जनचेतनामूलक कार्यक्रम गरिएको हो।

यसैविच, कक्षा १० मा अध्यनरत विद्यार्थीहरुले पोखरा लेखनाथ २६ को विजयपुरदेखि तालचोकसम्म सचेतनामूलक र्‍याली निकाल्दै बुढिवजार र तालचोकमा धुम्रपानको सेवनले हुने रोगबारे जानकारी गराउँदै कुनैपनि सुर्तीजन्य पदार्थको प्रयोगबाट टाडै रहनुपर्ने सन्देशमूलक नाटक प्रस्तुत गरिएको थियो । कार्यक्रममा विद्यालयका शिक्षक विज्ञान तिमिल्सिना, विदुर अर्याल, दिनेश रानाभाट, विद्यार्थी सेजल पुन, पुणिर्मा वाग्ले, सुजल परियार, वुढिवजार बजार ब्यवस्थापन समितिका अध्यक्ष दिपक अधिकारी र स्थानीय शक्तिवल्लभ सिग्देल लगायतले रोग लाग्नु पूर्वनै शरीरलाई हानी पुर्‍याउने धुम्रपान तथा मध्यपानबाट टाढै रहनुपर्ने सुझाव राखेको विद्यालयका कार्यक्रम संयोजक हिमाल शर्माले जानकारी दिए।