पोखरा, ५ जेठ । रोटरी क्लब अफ पोखरा अन्नपूर्णले एक विद्यालयका १ सय १६ जना विद्यार्थीलाई शैक्षिक सामग्री वितरण गर्नुका साथै २० जना छात्रछात्रालाई छात्रवृत्ति समेत वितरण गरेको छ ।

पोखरा लेखनाथ महानगरपालिका वडा २२, कालावाङस्थित भगवती निमाविका विद्यार्थीलाईलाई शैक्षिक सामग्री र छात्रवृत्ति वितरण गरिएको क्लब अध्यक्ष बाबुराम बरालले जानकारी दिए । सहयोग सामग्री क्लब अध्यक्ष बराल, क्वालिटी लाइफ अफ नेपालका अध्यक्ष रामचन्द्र शर्मा, क्लबका पूर्व अध्यक्षहरु माधवप्रसाद सिग्देल, कृष्णमान गुभाजु र तेजनाथ न्यौपानेले संयुक्त रुपमा हस्तान्तरण गरेका हुन्।

कार्यक्रममा क्वालिटी लाइफ अफ नेपालका अध्यक्ष रामचन्द्र शर्मा, विद्यालय प्रधानाध्यापक डिलकुमारी गुरुङ, विद्यालय व्यवस्थान समिति अध्यक्ष प्रकाशचन्द्र गुरुङ र क्लब अध्यक्ष बरालले मन्तव्य राखेका थिए । वितरित शैक्षिक सामग्रीका लागि क्वालिटी लाइफ अफ नेपालले आर्थिक सहयोग उपलव्ध गराएको थियो। सो वितरणपछि क्लब टोलीले कालावाङ घरेडीमा होम स्टे कार्यक्रम गरेको थियो ।