लेखनाथ, २५ वैशाख।  विश्व रेडक्रस दिवस अवसरमा नेपाल रेडक्रस सोसाइटी लेखनाथ उपशाखा वडा २७ ले मंगलबार खुला रक्तदान कार्यक्रम गरेको छ । कार्यक्रममा ५१ युनिट रगत संकलन भयो ।

रेडक्रस सोसाइटी कास्की शाखा सभापति डोलराज पाण्डेले पहिलो रक्तदाता नारायण काप\mलेलाई ब्लडब्याग हस्तान्तरण गरी कार्यक्रम उद्घाटन गर्दै धर्मका लागि मन्दिर धाउनुभन्दा मानवीय सेवाका लागि गरिएको रक्तदानले ठूलो पुण्य मिल्ने बताए ।

रगतको विकल्प अरु कुनै वस्तु नभएकाले मानिसका लागि मानिसकै रगत चाहिने यथार्थ जानकारी गराउँदै सभापति पाण्डेले आफू स्वच्छ र निरोगी भएर बाँच्न कम्तीमा वर्षको २ पटक वा सकेमा ४ पटक रक्तदान गर्दा शरीरलाई फाइदा हुने जानकारी दिए ।

रेडक्रस सोसाइटी लेखनाथ उपशाखा सभापति खगेन्द्रराज आचार्यको अध्यक्षतामा भएको सो कार्यक्रममा कास्की शाखाकी सदस्य रमा कोइराला, लक्ष्मी माविका प्रधानाध्यापक ऋषिकेश बराल, उपशाखाका निवर्तमान सभापति हिरामणि सुवेदी, राजनीतिककर्मी राजेन्द्रमणि लामिछाने, लेखनाथ सामुदायिक लायन्स अस्पतालतर्फबाट रोमनाथ पौडेल, लेखनाथ अर्घ बजार व्यवस्थापन समितिका अध्यक्ष शिवप्रसाद भण्डारी लगायतले रक्तदानको महत्व र उपयोगिताबारे जानकारी गराएका थिए। उपशाखाका सचिव तिलकशाली सापकोटाले सञ्चालन गरेको सो कार्यक्रममा धन्यवाद ज्ञापन उपसभापति राधामोहन पौडेलले गरेका थिए ।