पोखरा, २२ फागुन । पोखराको इञ्जिनियरिङ कलेजले फागुन २४ र २५ गते  ‘इञ्जिनियरिङ्ग एक्स्पो’ गर्ने भएको छ।

कलेजमा अध्ययनरत विद्यार्थीका प्रोजेक्ट सार्वजनिक गरिने छ। विद्यार्थीका सृजनालाई सार्वजनिक गरी थप हौसला प्रदान गर्ने र विकास गरिएका प्रविधिको व्यावसायिक उपयोगिताको प्रवर्द्वन गर्न उद्देश्यले एक्स्पो गर्न लागिएको हो ।

कलेजले मङ्गलबार पत्रकार सम्मेलन गरी एक्स्पो तयारी अन्तिम चरणमा पुगेको जनाएको छ।

एक्स्पोमा विद्यार्थीद्वारा निर्मित ट्राफिक लाइट कन्ट्रोलर, इजि इनर्जी, पेक एप, मेरो सवारी, रेन वाटर मोडल, सेयर टि्रप लगायत ४० भन्दा बढि सृजनाहरु प्रदर्शन गरिनेछ।

कलेजले वर्षेनी वा हरेक २ वर्षमा एक्स्पो गर्दै आएको प्रिन्सिपल लेखबहादुर गुरुङले जानकारी दिए।

‘यो एक्स्पो सबैका लागि उपयोगी छ’, प्रिन्सिपल गुरुङले भने-‘सहभागिताका लागि सबैलाई अनुरोध गर्दछौं।’ सो कलेजका विद्यार्थी मानवयन्त्र र भोटिङ यन्त्र निर्माण गरिसकेका छन्।

पत्रकार सम्मेलनमा कलेजका प्रशासन प्रमुख चिनकाजी गुरुङ र रिर्र्सच एण्ड डेभलप्मेन्ट प्रमुख सरोज गिरीले बोलेका थिए।