पोखरा, ३० पुस।रेडियो बाराहीमा लामो समय आवद्ध सञ्चारकर्मी रूपा कार्कीको निधन भएको छ।

उपचारका क्रममा शनिवार बिहान उनको भारतको दिल्ली अस्पतालमा निधन भएको पारिवारिक श्रोतले जनाएको छ।

उनले रेडियो बाराहीको स्थापना कालदेखि पाँच वर्षसम्म ‘साँहिली आमा’ नामक कार्यक्रम सञ्चालन गरेकी थिइन्। कार्यक्रमको लोकप्रियताले उनी पोखरामा साँहिली आमा भनेर चिनिएकी थिइन्। त्यसबाहेक रेडियोका अन्य कार्यक्रम बाराही कलइन, लोक संस्कृतिलगायतका कार्यक्रम सञ्चालन गरेकी थिइन्।

पोखरा शीतलदेवी निवासी रूपा विवाह भएर काठमाडौं गएपछि उनले रेडियो छाडेकी थिइन् ।

फोक्सो र पेटमा देखिएको समस्याका कारण विगत ५ महिनादेखि उनलाई दिल्लीमा उपचारार्थ भर्ना गरिएको थियो।