पोखरा । आईएसएमटी कलेज पोखरामा डाटा साइन्स एन्ड एआई फाउन्डेसन कोर्सबारे तालिम सम्पन्न भएको छ । पहिलो चरणको गत १०–२३ असारसम्म भएको तालिममा ४० जना विद्यार्थीले भाग लिएका थिए ।

कलेजको आइटी संकायका एआई विषयका शिक्षक एवं डिपार्टमेन्ट प्रमुख–कम्प्युटिङ शरण कार्कीले सहजीकरण गरेका थिए । उक्त कोषबाट विद्यार्थीले तथ्यांक संकलन, तथ्यांक प्रशोधन एवं रुपान्तरण र एआई टुल्स् प्रयोग गरी डाटा भिजुलाइजेसन गर्न सक्ने भएको बताए ।

शिक्षक शरण कार्की तथा क्याम्पस संयोजक शुष्मा रञ्जितले विद्यार्थीलाई सहभागिताको प्रमाणपत्र वितरण गरे । आइएसएमटी पोखरा क्याम्पसमा विद्यार्थीलाई डेटा विज्ञान र एआई कोर्सबारे प्रशिक्षण गराइएको थियो ।

कलेजले आइटी पढ्न चाहने विद्यार्थीका लागि आगामी दिनमा डाटा साइन्स र एआई लगायत डिजिटल मार्केटिङ र हाउस किपिङ विषयमा निशुल्क तालिम दिँदै जाने अप्रेसन एवं मार्केटिङ म्यानेजर शिव पौडेलले बताए । असार ३१ देखि सुरु हुने गरी रजिस्ट्रेसन खुलेको र तालिम लिन इच्छुकले गुगल फोर्म भर्न वा कलेजमा सम्पर्क गरेर सिट बुक गर्न सक्नेछन् ।

आइएसएमटी कलेज पोखरा बेलायतको प्रख्यात शैक्षिक संस्था युनिर्भसिटी अफ सन्डरल्याण्डबाट सम्बन्धन प्राप्त शिक्षण संस्था हो । आइएसएमटी ग्रुप अन्तर्गत नेपालका प्रमुख सहर पोखरा, काठमाडौं, चितवन, विराटनगर र बुटवलमा पनि कलेज सञ्चालित छन् । पोखरामा यो कलेज पोखरा–१५, नयाँगाउँमा छ ।