पोखरा । अन्नपूर्ण–३, मराउँचेस्थित बालज्योति आधारभूत विद्यालयलाई पेमा छाल शाक्य मोनास्ट्रिक इन्स्टिच्युटले विद्यालय पोशाक एवं स्टेसनरी तथा खेलकुद सामग्री सहयोग गरेको छ ।

हेमजास्थित इन्स्टिच्युटले आइतबार एक कार्यक्रमबीच २५ विद्यार्थी एवं ६ जना शिक्षक कर्मचारीलाई ट्रयाक सुट तथा स्टेसनरी सामग्री प्रदान गरेको हो । संस्थाले प्रतिविद्यार्थी ८ वटा कापी, एक÷एक दर्जन सिसाकलम, मेटास र कटर एवम् १ थान ज्यामिती बाकस प्रदान गरेको हो । त्यस्तै उक्त संस्थाले विद्यालयलाई ४ थान फुटबल एवं ४ थान ब्याटमिन्टन पनि उपलब्ध गराइएको छ ।

इन्स्टिच्युट अध्यक्ष टासी लामाले बालज्योतिमा सहयोग गर्न पाएकोमा खुसी व्यक्त गर्दै सहयोगसँगै विद्यालयमा शैक्षिक क्रियाकलाप सञ्चालनमा थप सहज हुने विश्वास लिए । उनले पठनपाठनमा ध्यान दिन विद्यार्थीलाई सुझाव दिँदै शिक्षा गुणस्तरीय हुनुपर्ने औंल्याए ।

विद्यालयका अध्यक्ष डिल्लीराम पौडेलले सहयोगको सदुपयोग हुने विश्वास दिलाउँदै सहयोग आफैंमा महत्वपूर्ण हुने धारणा राखे ।

इन्स्टिच्युट सचिव लोब्साङ लामाले कार्यक्रमसँगै इन्स्टिच्युट र मराउँचेवासीबीच थप आत्मीयता बढेको भनाइ राख्दै आगामी दिनमा पनि सहकार्य गर्दै जाने प्रतिबद्धता जनाए ।

त्यस अवसरमा कार्यपालिका सदस्य पार्वती पौडेल, प्रधानाध्यापक राजकुमार कुँवर लगायतले सहयोगप्रति आभार प्रकट गरे । विद्यालय अध्यक्ष पौडेलको अध्यक्षतामा भएको उक्त कार्यक्रम शिक्षक शारदा पौडेलले सञ्चालन गरिन् ।