पोखरा । पोखरा १८, भकुन्डेस्थित शान्त माध्यमिक विद्यालयबाट २०८० सालको एसइईमा सहभागी भई सफलता प्राप्त गरेका विद्यार्थीलाई मंगलबार एक कार्यक्रमबीच बधाई दिर्दै सम्मान गरियो ।

कार्यक्रममा कार्यवहाक वडाध्यक्ष रमेश थापाले विद्यार्थीको समुज्ज्वल भविष्यको कामना गर्दै विद्यालयको सर्वांगीर्ण विकासमा वडा सधैं तत्पर रहेको बताए ।

विद्यालयका अध्यक्ष बुद्धिबहादुर खड्काले विद्यार्थीलाई अनुशासित बन्न सुझाव दिँदै विद्यार्थीको वृद्धि विकासमा विद्यालय प्रयासरत रहँदै आएको स्पष्ट पारे ।

प्रधानाध्यापक कृष्णप्रसाद तिमिल्सिनाले विद्यार्थीको अथक परिश्रमबाट सफलता हासिल भएको औँल्याउँदै विद्यार्थीलाई लगनशील बन्न सुझाव दिए ।

शिक्षकहरु शिव लम्साल र सूर्यप्रसाद तिमिल्सिना, अभिभावक नारायण दाहाललगायतले विद्यार्थीको सफल भविष्यको कामना गर्दै सफलताका लागि अनुशासनसहितको मिहिनेत आवश्यक रहने चर्चा गरे ।

सर्वोत्कृष्ट नतिजा ल्याउन सफल सुयोग पराजुलीले विद्यार्थीको भविष्यप्रति विद्यालय सधंै चिन्तनशील रहेको धारणा राख्दै विद्यालयमा रहँदा आफूले अभिभावकीय भूमिका पाएको स्मरण गरे ।

शान्तबाट यसवर्ष एसइईमा सफलता प्राप्त गर्ने विद्यार्थीले अधिकतम् ३.८५ जिपिए प्राप्त गरेका छन् । त्यहाँबाट सम्मिलित कुल ३३ विद्यार्थी मध्ये ३१ जना अर्थात् ९५ प्रतिशत विद्यार्थी उत्तीर्ण भएका छन् ।