कांग्रेस–एमालेबीच सहमति, पहिलो चरणमा ओली प्रधानमन्त्री

आदर्श समाज सम्वाददाता
असार १८, २०८१
oli

पोखरा । कांग्रेस–एमालेका शीर्षनेताबीच छलफलपछि अन्ततः वर्तमान समीकरण भत्किने निश्चित भएको छ । हालको समीकरण तोडेर नयाँ सरकार बनाउन प्रमुख दल नेपाली कांग्रेस र नेकपा एमालेबीच सहमति भएको हो ।

गएराति मध्यरातमा कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच सहमति पत्रमा हस्ताक्षर भएको छ ।

सहमति अनुसार पहिलो चरणमा एमाले अध्यक्ष ओलीको नेतृत्वमा सरकार गठन हुनेछ । दोस्रो कार्यकालमा सरकारको नेतृत्व देउवाले गर्नेछन् ।

प्रदेश सरकारतर्फ एमालेले कोशी, लुम्बिनी र कर्णाली प्रदेश सरकारको नेतृत्व गर्ने र कांग्रेसले बागमती, गण्डकी र सुदूरपश्चिम प्रदेश सरकारको नेतृत्व गर्नेछन् । मधेस प्रदेश सरकारको नेतृत्व मधेसवादी दललाई नै दिने सहमति बनेको छ ।

एमाले महासचिव शंकर पोखरेलले नेकपा एमाले र नेपाली कांग्रेसबीच राष्ट्रिय सहमतिको सरकार बनाउने समझदारी भएको सामाजिक संजालमा लेखेका छन् । ‘राजनीतिक स्थायित्वका लागि संविधानमा आवश्यक संशोधन गर्ने र तदनुरुपका कानुन समेत निर्माण गर्ने गरी केपी शर्मा ओलीको नेतृत्वमा राष्ट्रिय सहमतिको सरकार बनाउन नेकपा एमाले र नेपाली कांग्रेसका बीचमा समझदारी,’ उनले भनेका छन् ।

कांग्रेस र एमालेले सहमति गरेपछि यता माओवादी अध्यक्ष एवं प्रधानमन्त्री पुष्पकमल दाहाल प्रचण्डले तत्काल राजीनामा नदिने संकेत गरेका छन् ।

Related News

सम्बन्धित समाचार

hero news full width