पोखरा । पोखरामा साना तथा मझौला व्यवसायी महासंघ नेपालले एसएमई एक्स्पो तयारी गरेको छ । असार १३ देखि १७ सम्म पोखरा नयाँबजारस्थित प्रदर्शनी केन्द्रमा हुने एक्स्पो साना तथा मझौला व्यवसायी संघ कास्कीसँगको सहकार्यमा हुनेछ ।

मेलामा नेपालमा उत्पादित सामग्रीको स्टल रहने महासंघ अध्यक्ष हरि पराजुलीले मंगलबार पत्रकार सम्मेलनमा जानकारी दिए । अल्लोबाट उत्पादित सामाग्रीदेखि नेपालका मौलिकता झल्काउने सामग्री आकर्षणका रुपमा रहने उनले बताए । उनका अनुसार मेलामा ५० बढी स्टल रहने छन् । मेलामा निशुल्क स्टल राख्ने व्यवस्था छ ।

अध्यक्ष पराजुलीका अनुसार लत्ताकपडा, दैनिक उपभोग्य घरायसी सामग्री, खाद्यान्न, डेरी, वनमा आधारित फाइबर बेसका उत्पादन, काष्ठ तथा धातुजन्य, हस्तकलाका सामग्री, पशुपंक्षी, फ्लोरिकल्चर लगायतका सेवा र बस्तु स्टलमा हुनेछन् ।

पोखराको पर्यटन प्रबद्र्धनसँगै सरकार र साना तथा मझौला व्यवसायीबीच विश्वास र समन्वय अभिवृद्धि गर्न एक्स्पो आयोजना गरेको अध्यक्ष पराजुली बताउँछन् । देश विदेशबाट सांस्कृतिक नृत्य, लोकदोहोरी गीत प्रतियोगितासँगै चर्चित लोकदोहोरी कलाकारले प्रस्तुति राखिनेछ । भारतका ४ प्रान्तका कलाकारले पनि सांस्कृतिक प्रस्तुति राख्ने जनाइएको छ ।

एक्स्पोको गण्डकी प्रदेशका सामाजिक विकास मन्त्री विन्दुकुमार थापाले उद्घाटन गर्ने तय भएको छ । एक्स्पो सम्पन्न गर्न झन्डै ७० लाख रुपैयाँ खर्च लाग्ने आयोजकको अनुमान छ ।