पोखरा। करन परियारले नेपाल आइडल सिजन–५ को उपाधि जितेका छन् । भोटिङ आधारमा शनिबार ग्रान्ड फिनालेमा उनलाई नेपाल आइडल घोषणा गरिएको हो ।

बर्दियाका करन कमजोर आर्थिक पृष्ठभूमिबाट नेपाल आइडलको भव्य पृष्ठभूमिमा छिरेका थिए । आफ्नो जादुमयी स्वरले उनी आखिर पाँचौं नेपाल आइडल बनेका हुन् । उनले नगद २५ लाख पुरस्कार प्राप्त गरेका छन् ।
ग्रान्ड फिनालेमा उत्कृष्ट ४ जना थिए । फस्ट रनर अप पोखराकी सलोमी गुरुङ भइन् । सेकेन्ड रनर अप सचिन विश्वकर्मा भए । मोहित भुजेल थर्ड रनर अप भए ।

देशका विभिन्न भागबाट सहभागी प्रतिस्पर्धीबीच ३१ औं श्रृङ्खलासम्म चलेको थियो ।

नेपाल आइडलमा न्ह्यु बज्राचार्य, इन्दिरा जोशी र कालीप्रसाद बास्कोटा निर्णायक थिए।

पोखराका बुद्ध लामा पहिलो नेपाल आइडल हुन् । नेपाल आइडल सिजन २ देखि ४ सम्म क्रमशः रवि ओड, सज्जा चौलागाई र भूपेन्द्र थापा मगर हुन् ।