पोखरा । महिला पर्यटन व्यवसायी मञ्चले जिल्ला कारागार कास्कीमा रहेका महिलाहरूलाई सेनेटरी प्याड, म्याट्रेस तथा युरोगार्ड वितरण गरेको छ । सामाजिक उत्तरदायित्वअन्तर्गत कारागाराका महिलालाई सेनेटेरी प्याडलगायत सामग्री हस्तान्तरण गरिएको मञ्चका अध्यक्ष उमा रेग्मी भण्डारीले बताइन् ।

उनका अनुुसार महिलाहरूलाई अत्यावश्यक सेनेटरी प्याड एक हजार २ सय थान, म्याट्रेस १ रोल र युरो गार्ड १ थान हस्तान्तरण गरिएको हो ।

मञ्चका अध्यक्ष उमा रेग्मी भण्डारीको अध्यक्षता तथा संस्थापक अध्यक्षता जमुना पराजुलीको प्रमुख आतिथ्यतामा भएको कार्यक्रममा जिल्ला प्रहरी कार्यालय कास्कीका प्रहरी नायव उपरीक्षक वसन्तकुमार शर्मा, मञ्चका पदाधिकारीलगायतको उपस्थिति थियो ।

मञ्चले स्वदेश एवं विदेशमा पर्यटन राजधानी पोखरासहित समग्र देशको पर्यटन प्रवद्र्धनका साथै सामाजिक उत्तरदायित्वअन्तर्गतका विभिन्न कार्यक्रम सञ्चालन गर्दै आएको अध्यक्ष भण्डारीले बताइन् ।