पोखरा । गण्डकी प्रदेशस्तरीय पुरुष टि–२० क्रिकेट उपाधिका लागि कास्की र स्याङ्जा भिड्ने भएका छन् ।

समूह ‘बी’ को खेलमा स्याङ्जा बुधबारको खेलमा अपराजित रहँदै ६ अंक बटुलेर कास्कीसँग फाइनल भिडन्त पक्का गरेको हो । समूह ‘ए’ बाट कास्की यसअघि फाइनल पुगिसकेको थियो ।

पोखरा रंगशालास्थित क्रिकेट खेल मैदानमा बुधबार लिग चरणको अन्तिम खेलमा नवलपुरलाई स्याङ्जाले २ विकेटले पराजित गरेको हो । टस जितेर व्याटिङका लागि मैदानमा उत्रिएको नवलपुरले १७ ओभरमा सीमित गरिएको खेलमा १६.४ ओभरमा ७५ रन मात्रै बनाउन सक्यो ।

नवलपुरका लागि रिजन काफ्लेले ४५ बलमा ३० रनको योगदान दिए । कमल परियारले २२ बलमा १८ रनमात्र जोड्न सके । यस्तै, सुदीप अर्यालले १२ रनको योगदान दिए । पहिलो ओभरमा नै २ विकेट गुमाउँदै दबाबमा रहेको नवलपुर १३.६ ओभरमा ६८ रनमा ५ विकेट गुमाउन पुगेको थियो ।

स्याङ्जाका लागि प्लेयर अफ दि म्याच सन्दीप खत्री क्षत्रीले २.४ ओभरमा १४ रन दिएर २ विकेट लिए भने अंकित न्यौपानेले ३ ओभरको बलिङ स्पेलमा १३ रन खर्चिएर २ विकेट हात पारे ।

जवाफी ब्याटिङमा उत्रिएको स्याङ्जालाई जितका लागि अन्तिम ओभर कुर्नु प¥यो । १६.२ ओभरमा ८ विकेटको क्षतिमा ७९ रन बनाउँदै लक्ष्य भेटाउन सक्यो । जितका लागि अनिष ताम्राकारले १५ बलमा २ चौका र २ छक्का प्रहार गर्दै २२ रनको योगदान दिए । ईश्वर क्षत्रीले २९ बलमा २१ रन बनाए भने प्रदीप पाण्डेले नटआउट रहँदै ११ रन बनाए ।

नवलपुरका लागि कमल परियारले ४ ओभरमा १ मेडन राख्दै १२ रन दिएर ३ विकेट लिँदा दीपक डुम्रेले ३ ओभरमा १ मेडनसहित ६ रन दिएर २ विकेट लिए ।

दशौं राष्ट्रिय खेलकुद प्रतियोगिताका लागि प्रारम्भिक टिम छनोट समेत रहेको यो प्रतियोगितामा विजेता टिमले १ लाख र उपविजेताले ५० हजार साथमा ट्रफी, मेडल तथा प्रमाणपत्र प्राप्त गर्ने गण्डकी प्रदेश क्रिकेट संघ अध्यक्ष सञ्जयकान्त सिग्देलले जानकारी दिए।

फाइनल बिहीबार हुनेछ।