पोखरा । आईसीसी टी–२० विश्वकप अन्तर्गत नेपाल र श्रीलंकाबीचको खेल वर्षाका कारण रद्द भएको छ । योसँगै दुवै टिम समान एक एक अंक बाँडे ।

अमेरिकाको फ्लोरिडास्थित ब्रोआर्ड काउन्टी मैदानमा बुधबार बिहानदेखि निरन्तर वर्षाका कारण मैदान भिजेको थियो । खेल रद्द भएपछि दर्शकले टिकटवापतको रकम फिर्ता पाउने बताइएको छ ।

नेपालको योसँगै २ खेलमा १ अंक भएको छ । ३ खेलमा १ अंक जोडेको श्रीलंका भने प्रतियोगिताबाट बाहिरियो । श्रीलंकाले पहिलो दुई खेलमा क्रमश दक्षिण अफ्रिका र बंगलादेशसँग पराजित भएको थियो ।

समूह डि मा रहेको अर्को मुलुक दक्षिण अफ्रिका सुपर ८ मा पुगिसकेको छ । उसले ३ खेलमा ६ अंक जोडेको हो ।

उता, बंगलादेश र नेदरल्यान्ड्सको २ खेलमा २–२ अंक छ । नेपाल पहिलो खेलमा नेदरल्याण्डसँग ६ विकेटले पराजित भएको थियो ।

नेपाली टोली अब वेस्ट इन्डिज लाग्नेछ । नेपालले क्यारेबियनको सेन्ट भिन्सेन्टमा जुन १४ (३२ जेठ) मा दक्षिण अफ्रिकासँग र जुन १६ (२ असार) मा बंगलादेशसँग प्रतिस्पर्धा गर्नेछ ।