अन्तरजातीय विवाह गर्ने १० जोडी सम्मानित

आदर्श समाज सम्वाददाता
जेठ २९, २०८१
Intercast marrige bharatpur

चितवन । भरतपुर महानगरपालिकाले अन्तरजातीय विवाह गरेका १० जोडीलाई सम्मान गरेको छ । भरतपुर महानगर प्रमुख रेनु दाहाल, उपप्रमुख चित्रसेन अधिकारी, निमित्त प्रमुख प्रशासकीय अधिकृत उपेन्द्र पौडेलले एक समारोहमा उनीहरुलाई संयुक्तरुपमा सम्मान गरेका हुन् ।

सम्मानित हुनेमा भरतपुर–१९ का आशीष विक र शान्ति घर्ती, भरतपुर–१९ कै सुवन गहतराज र शान्ता श्रेष्ठ, भरतपुर–२३ का नवीन विक र कमला श्रेष्ठ, भरतपुर–११ का विवेक सुनार र अम्बिका कार्की, भरतपुर–१६ सुशील परियार र सुस्मिता बुढाथोकीको जोडी छन् । यस्तै, भरतपुर–२५ का अविनास सुनार र मीना भुजेल, भरतपुर १४ विवश महतो र प्रतिभा सुनार, भरतपुर १४ कै पदमबहादुर विक र फूलमाया लावती, भरतपुर १५ का विनोद परियार र अरुणा राई, भरतपुर ६ का सुवास विक र मायाँ कुमालको जोडी छन् । एक जोडीलाई जनही १ लाखसहित सम्मान गरिएको हो ।

कार्यक्रममा भरतपुर महानगरपालिका प्रमुख दाहालले ४ वर्षदेखि सुरुवात भएको सम्मान कार्यक्रममा क्रमश जोडीको संख्या वृद्धि हुँदै गएको बताइन् । भरतपुर महानगरपालिकालाई सभ्य र सुसंस्कृत बनाउने उद्देश्यले यो अभियानको थालनी गरिएको उनको भनाइ छ । जातीय विभेदलाई अन्त्य गराउन यस्ता कार्यक्रमलाई प्राथामिकतामा राखेको प्रमुख दाहालले उल्लेख गरिन् ।

भरतपुर महानगरपालिकाले प्रत्येक जोडीलाई १ लाखसहित सम्मान गरेको हो

जनयुद्धको समयभन्दा अगाडि मान्छेले मान्छेलाई पशुजन्य व्यवहार गर्ने गरेको घटना स्मरण गर्दै प्रमुख दाहालले पहिलाकाके अवस्था निकै काहालीलाग्दो रहेको बताइन् । जनयुद्ध जगमा पाएका अधिकारलाई कार्यान्वन गर्न निरन्तर खबरदारी र संघर्ष जारी राख्नुपर्ने उनको भनाइ थियो ।

भरतपुर महानगर उपप्रमुख चित्रसेन अधिकारीले शिक्षा, स्वास्थ्य, पूर्वाधारलगायतका विषयमा फड्को मारेको र जातजातिमा हुने विभेद अन्त्यका लागि सम्मान कार्यक्रम गरिएको बताए ।

देशभरका ७ सय ५३ पालिकामध्ये भरतपुरले अन्तरजातीय जोडीलाई सम्मान गरी उदाहरणीय कार्य गरेको उपप्रमुख अधिकारीले बताए । कार्यक्रममा महानगरका निमित्त प्रमुख प्रशासकीय अधिकृत उपेन्द्र पौडेलले छुवाछूत समाजिक अन्धविश्वास रहेकाले यसको उन्मुलनको लागि सबै पक्ष एकजुट हुनुपर्ने बताए । मानिसको २ जात महिला र पुरुषमात्र भएकाले सबैले आत्मसम्मानसहित बाच्न पाउनुपर्ने वातावरण सिर्जना गर्नुपर्नेमा जोड दिए । महानगरले यसअघि १३ जोडीलाई सम्मान गरेको थियो ।

Related News

सम्बन्धित समाचार

hero news full width