पोखरा । पोखराको जिरो किलोमिटरदेखि हल्नचोकसम्म पुग्दा सडकबीच डिभाइडरमा हरिया धूपी र फूल ढकमक्क फुलेको भेटिन्छ । यो हरियाली र फूलहरुले लेकसाइड जाने पर्यटक तथा स्थानीयको ध्यान तान्ने गरेको छ ।

यसलाई रेखदेख गर्न बेलाबेलामा यहाँका स्थानीय लागि रहन्छन् । यता रेखदेखको सिप बोकेर उनीहरू पोखरा २५ हेमजाको अन्तर्गतको राजमार्ग सडक डिभाइडरमा पुगेको छन् ।

ठेकेदारले रोपेका बिरुवाहरु मर्दै गएपछि सडकलाई हरियाली बनान उपयुक्त फूलका बिरुवा बोकेर पोखरा ६ र ७ का अगुवाहरू हेमजा पुगेका हुन् ।

वातावरण संरक्षणका अभियन्ताहरू जगन्नाथ तिमिल्सिना, होमनाथ पहारी (माइला बा), रामबहादुर लामिछाने, ठाकुर बराल, सञ्जय पौडेल, दामु बराल, राजेन्द्रराज रेग्मी, गंगाप्रसाद तिवारी पुगेका छन् । उनीहरूले लेकसाइडको डिभाइडरबाट फूलका कटिङहरू लगेर सारेका हुन् ।

अहिलेसम्म १ हजार कर्बिर फूलका बिरुवा सारी सकेको अभियानका सदस्य दामु बरालले बताए । उनले अझै १ हजारभन्दा बढी कर्बिर फूलका बिरुवा रोप्ने तयार पारेको बताए । बिरुवा सार्नका लागि सहयोग गर्न हेमजाबासीलाई बरालले अनुरोध गरे । कर्बिरका दुई थरी रातो र सेतो फुल्ने फूल सारेको उनले बताए ।

पोखरा २५ का वडा अध्यक्ष मोती तिमिल्सिनाले उनीहरूको कामलाई धन्यवाद दिँदै फेसबुकमा अन्यलाई पनि सहयोग गर्न आग्रह गरेका छन् । फूल हुर्काउन निकै मेहनत गर्नुपर्ने अभियानका सदस्य जगन्नाथ तिमिल्सिनाले बताए । उनकै नेतृत्वमा बिरुवा सार्ने काम भएको छ । यो बिरुवा हरियाली र सौन्दर्यकरणका लागि उपयुक्त भएको उनले बताए ।