पोखरा । गण्डकी प्रदेशका मुख्यमन्त्री सुरेन्द्रराज पाण्डेले विश्वासको मत प्राप्त गरेका छन् ।

सोमबारको प्रदेश सभा बैठकमा माओवादीको चिह्नबाट चुनाव जितेका नेसपाका फणिन्द्र देवकोटाले फ्लोरक्रस गरेपछि उनलाई विश्वासको मत मिलेको हो । योसँगै दोस्रो कार्यकालको मुख्यमन्त्रीमा उनको निरन्तरता हुनेछ ।

सभामुख कृष्णप्रसाद धितालले मुख्यमन्त्री पाण्डेका पक्षमा ३१ सांसदले मत दिएकाले विश्वासको मत प्राप्त भएको घोषणा गरेका थिए । एमालेका २२ र माओवादी ६ सहित २८ सांसदले पाण्डेले मागेको विश्वासको प्रस्तावका विपक्षमा मत हालेका छन् । ६० सदस्यीय प्रदेशसभामा विश्वासको मतका लागि (सभामुखबाहेक) ५९ सांसदले भाग लिएका थिए ।

कांग्रेसका २७ सहित राप्रपाका २, माओवादी चुनाव चिह्नबाट विजयी नेपाल समाजवादी पार्टीका सांसद फणिन्द्र देवकोटा र स्वतन्त्र सांसद राजीव गुरुङ (दीपक मनाङे) को प्रस्तावको पक्षमा मत दिएका हुन् ।

सर्वोच्च अदालतको परमादेशले संविधान धारा १६८ (३) बमोजिम कांग्रेस संसदीय दलका नेता पाण्डे गत १६ जेठमा मुख्यमन्त्री नियुक्ति भएका हुन् ।