पोखरा । गण्डकी प्रदेशमा अहिले सरकार बनाउने र गिराउने खेल भइरहेको छ । जसमा सभामुखलाई समेत गोटी बनाइएको छ । मुख्यमन्त्री सुरेन्द्रराज पाण्डेले विश्वासका मतका लागि सूचना दर्ता गराएपछि यसबारेमा विभिन्न तर्क विर्तक आइरहेका छन् । एकातिर उनले वहुमत कसरी पु¥याउलान भन्ने छ भने अर्कोतिर ३१ पुग्ने पक्का भएर नै संसद फेस गर्न लागेकाले प्रतिपक्षले अर्को चाल चल्छ भन्ने ।

कांग्रेसको २७, राप्रपाको २, दिपक मनाङेको १ र माओवादीको चिह्नबाट चुनाव जितेका नेपाल समाजवादी पार्टीका फडिन्द्र देवकोटाको १ गरी ३१ पुग्ने आँकलन गरिएको छ । मुख्यमन्त्री पाण्डेले यही समीकरणलाई आधार मानेर संसद फेस गर्न लागेका हुन् ।

२ पटकसम्म मुख्यमन्त्री भएर पनि बजेट ल्याउन नपाएका र मन फुकाएर काम गर्न नपाएका खगराज अधिकारी र माओवादीसहितको उनको गठबन्धन पाण्डे सरकारमा रहेको देख्न चाहँदैन । खगराज अधिकारीले त ४ दिन अघिको १ कार्यक्रममा अब फेरि आफू मुख्यमन्त्री बन्ने ठोकुवा नै गरे । अहिले पाण्डे सरकारका पक्षमा बहुमत पुग्न नदिन प्रतिपक्षी गठबन्धनसँग ३ उपाय छन् । पहिलो मनाङेलाई रोक्ने, दोस्रो देवकोटालाई छेक्ने र तेस्रो सभामुख र उपसभामुखलाई राजीनामा दिन लगाएर संसद वहिस्कार गर्ने ।
पहिलो र दोस्रो प्रयास जारी रहे पनि तेस्रो प्रयास भने सफल हुने देखिएको छैन । राजीनामाका लागि सभामुख कृष्णप्रसाद धिताल सहमत छैनन् । यसबारेमा सभामुखले सार्वजनिकरुपमा मुख भने खोलेका छैनन् । संविधानले दिएको अधिकार र कर्तव्य पालना गर्नु आफ्नो दायित्व रहेको बताउँदै आएका छन् ।

त्यसो त खगराज अधिकारीले विश्वासको मत लिने बेलामा समेत सदननको बहुमत ३१ नै हो, सभामुखलाई गणना गर्न हुँदैन भन्ने अडानमा उनी थिए । तर गठबन्धनको एकोहोरो पेलाउन खेप्न नसकेपछि उनी निर्णायक अवस्थामा आफूसँग मत दिने पाउने अधिकार रहेको भन्दै ३० लाई नै बहुमत भनी घोषणा गरिदिएका थिए । जुन घोषणालाई सर्वोच्च अदालतले असंवैधानिक सावित गरिदिएको थियो । अहिले एमाले र माओवादीले उनलाई राजीनामा दिन दबाब दिइरहेका छन् । तर उनी कुनै हालतमा सभामुख पद नछाड्ने पक्षमा रहेपछि खगराज अधिकारी अर्को दबाबमा परेका छन् । यसबारेमा छलफल गर्न खगराज आजै काठमाडौं जाँदैछन् ।

सर्वोच्चको परमादेशपछि जेठ १६ मा मुख्यमन्त्रीमा नियुक्त पाण्डेले पर्सि २८ गते विश्वासको मतका लागि संसद सचिवालयमा सूचना दर्ता गराएका छन् । जस अनुसार २८ गते ३ बजेका लागि संसद बैठक बोलाइएको छ । नीति तथा कार्यक्रम र बजेट अगावै विश्वासको मत लिनका लागि पाण्डेले सूचना दर्ता गरेका हुन् ।

केन्द्रमा गएर शीर्ष तहमा कुरा गरेपछि पोखरा फर्केका पाण्डे विश्वासको मतका लागि तयार भएका हुन् । नत्र अध्यादेशबाटै बजेट ल्याउने एकखालाको तयारी पनि भएकै थियो ।