पोखरा । प्रदेश खेलकुद परिषद् गण्डकी आयोजना तथा गण्डकी प्रदेश फुटबल संघ व्यवस्थापनमा शुक्रबारदेखि पोखरामा प्रदेशस्तरीय पुरुष फुटबल प्रतियोगिता सुरु भएको छ ।

पोखरा रंगशालामा भएको उद्घाटन खेलमा तनहुँले गोरखाविरुद्ध ३–० गोलअन्तरले सहज जित निकालेको छ । तनहुँलाई अग्रता दिलाउनेक्रममा पहिलो गोल शान्ताबहादुर गुरुङले २० औं मिनेटमा गोलको खाता खोले । पहिलो हाफमा गोरखाविरुद्ध आक्रमक रुपमा प्रस्तुत भएको तनहुँले २३ औं मिनेटमा दोस्रो गोल थप्यो । तनहुँका लागि राम थापाले गोल गरे । तेस्रो गोल पहिलो हाफकै ३१ औं मिनेटमा जिवेश आले मगरले गरे ।

यसअघि, प्रदेश खेलकुद परिषद् गण्डकीका सदस्यसचिव श्रीधर शर्माले प्रतियोगिता उद्घाटन गरेका थिए । गण्डकी प्रदेश फुटबल संघका वरिष्ठ उपाध्यक्ष मिलन गुरुङको अध्यक्षतामा कार्यक्रम भएको थियो ।

२८ जेठसम्म सञ्चालन हुने प्रतियोगितामा गण्डकीका १० जिल्लाले भाग लिएका छन् । नकआउट आधारमा खेल ४ दिनसम्म चल्ने संघका महासचिव विनोद गुरुङले बताए । प्रतियोगिताबाट दशौं राष्ट्रिय खेलकुद प्रतियोगिताका लागि खेलाडी छनोट हुनेछन् ।