पोखरा । केन्द्रमा सत्ता समीकरणसँगै छचल्किएको प्रदेशको राजनीति स्थिर बन्नेमा आशंका उब्जिरहेका बेला मुख्यमन्त्री सुरेन्द्रराज पाण्डेले विश्वासको मत लिन लागेका छन् । यसका लागि जेठ २८ गते दिउँसो ३ बजेका लागि संसद बैठक समेत आह्वान भइसकेको छ ।
बिहीबार बिहान अर्थ तथा विकास समितिको बैठकमा भाग लिएर दिउँसो काठमाडौं पुगेका मुख्यमन्त्री पाण्डे आफ्नो पक्षमा बहुमत जुटाउन सभापति देउवाको साथ लिए । मुख्यमन्त्री पाण्डेले हिजो र आज राप्रपा सभापति राजेन्द्र लिङ्देन र नेपाल समाजवादी पार्टी अध्यक्ष बाबुराम भट्टराइसँग भेटे । प्रचण्डसँग रिसाइरहेका भट्टराई गण्डकीमा कांग्रेस सरकारप्रति नरम नै देखिँदै आएका थिए । माओवादीको चुनाव चिह्न लिएर जितेका उनकै पार्टीका फडिन्द्र देवकोटा प्रदेश सभा सदस्य छन् । उनैलाई गनेर माओवादीका सभामुखवाहेक ७ सांसद गण्डकीमा छन् । कांग्रेसको २७ सहित राप्रपाको २ र दिपक मनाङेको १ गरी ३१ पुग्ने र बहुमत पुग्नका लागि देवकोटा नै चाहिन्छन् । यसमा पार्टी अध्यक्ष विश्वस्त पारेपछि मुख्यमन्त्री पाण्डे ढुक्क देखिएका छन् । दलको ह्विप नमानी फ्लोर क्रस गरे देवकोटामाथि दलले कारवाही गर्ने छ । यसबाट उनको सांसद पदसमेत जान सक्छ । यो खतरा मोल्न देवकोटा र उनको पार्टी तयार भएपछि मुख्यमन्त्री ढुक्क देखिएका हुन् । देवकोटाको पद गएकै खण्डमा समेत सरकारको बहुमत हुने छ । उनको पद गइहाले प्रदेश सभामा ५९ सदस्य बाँकी रहनेछन् । त्यसका लागि बहुमत ३० चाहिन्छ । त्यति हुँदा पनि कांग्रेसकै पक्षको बहुमत कायम रहन्छ ।
फडिन्द्र कारवाहीमा परे एमाले माओवादी गठबन्धनमा एमालेको २२ र माओवादीको (सभामुख वाहेक) ६ जोडिँदा २८ मत मात्र पुग्छ । यही आधारमा पाण्डे सरकार विश्वस्त भएको हो । तर देवकोटाको पद जानका लागि उनकै माउ पार्टीको पनि स्वीकृति चाहिने भएकाले यो मुद्दा अदालत प्रवेश गर्ने पक्का छ ।
केन्द्रमा एमालेका केपी ओली र प्रधानमन्त्री प्रचण्डसँग बिच्किएको राप्रपाले गण्डकीमा साथ दिने प्रतिबद्धता जनाएको र दीपक मनाङे पनि कांग्रेस गठबन्धनमा आबद्ध हुने संकेत गरेपछ मुख्यमन्त्री ढुक्क भएर आज दिउँसो पोखरा फर्केका छन् । अब माथि मिलाउने काम शीर्ष तहबाट हुनेछ । उनी फर्के लगत्तै सरकारका मन्त्री र आफू निकट सांसदलाई उनले खुसीको खबर सुनाए । अनि मुख्यमन्त्री तथा मन्त्रिपरिषद्को कार्यालयले तयार पारेको पत्र लिएर मन्त्री बिन्दुकुमार थापा संसद सचिवालय पुगेर सूचना दर्ता गराएका हुन् ।
१६ गते मुख्यमन्त्रीमा नियुक्त पाण्डेले जसै पनि असार १४ गतेसम्म विश्वासको मत लिनै पर्छ । नीति तथा कार्यक्रम र बजेट अगावै विश्वासको मत लिँदा ढुक्क पनि हुने भएकाले पाण्डेले यो रणनीति अंगालेका हुन् । संसद अधिवेशन अन्त्य गरी अध्यादेशबाट बजेट ल्याउँदा पनि विश्वासको मत लिने बेलामा उल्झन हुन सक्छ । अध्यादेश त्यतिबेला सदनमा पेस गर्नुपर्ने हुन्छ ।
तर पाण्डे सरकरको बहुमतका लागि अवस्था त्यति सोचेजस्तो सहज छैन । किनभने प्रदेश र केन्द्रमा सत्ताका नाममा हुने गरेको चलखेल दोहोरिने सम्भावना पनि उत्तिकै छ । यसका लागि प्रतिपक्षले सभामुख र उपसभामुखको राजीनामा गराउन सक्छ । प्रदेश सभामा सभामुख माओवादीका कृष्णप्रसाद धिताल र उपसभामुख एमालेका बिना थापा छन् । संसदीय अभ्यासका नाममा हुने यस्ता खेलले प्रणालीमाथि नै खिल्ली उडाउने विश्लेषण समेत भइ नै रहेका छन् । कांग्रेसलाई असफल गराउन प्रतिपक्ष सफल हुने भए पनि नागरिकले यसलाई राजनीतिक बेइमानीका रुपमा लिनेछन् । सभामुख र उपसभामुखको राजीनामासँगै प्रतिपक्षी दल एमाले र माओवादीले २८ गतेको संसद बैठक वहिष्कार गर्ने चर्चा पनि चलेको छ ।
उसो त एमालेले अहिलेको गठबन्धनलाई चेपुवामा पार्न दिपक मनाङेलाई प्रयोग गर्न खोजिरहेको छ । मनाङको राजनीतिमा अगाडि बढ्ने अवसर बाँकी नै रहेको भन्दै उनलाई कांग्रेसले पनि उसैगरी फकाइरहेको छ । त्यहिक्रममा सुरेन्द्र पाण्डेले आफू अल्पमतमा परेका बेलामै मनाङेलाई भौतिक मन्त्री बनाएका थिए । आगामी दिनमा मनाङबाट प्रतिनिधि सभामा उठाउने सम्मका आश्वास उनले पाएका छन् । उता एमालेले पनि उसैगरी आश्वासन दिइरहेको छ । गण्डकीको सत्ता राजनीतिमा बाजीको गोटी बनेका मनाङे कता लाग्छन् त्यतैको बहुमत पुग्छ । त्यसैले २८ गतेसम्म मनाङेको मनस्थिति के हुन्छ त्यसैले पनि पाण्डे सरकारको भविष्य सुनिश्चित गर्छ ।
त्यसो त बजेट अगाडि विश्वासको मत लिने विषयमा मुख्यमन्त्री पाण्डेले एमाले संसदीय दलका नेता खगराज अधिकारी, माओवादी संसदीय दलका नेता हरिबहादुर चुमान, माओवादी प्रमुख सचेतक कुसुम बुढा पुनसँग पनि भेटवार्ता गरेका थिए । प्रादेशिक संरचनालाई मजबुत बनाउन, राजनीतिक स्थायित्वका लागि नीति तथा कार्यक्रम र बजेट ल्याउन मुख्यमन्त्रीले सहयोग मागेका थिए । पूर्व मुख्यमन्त्री अधिकारीले हुन्छ सघाउँला भने पनि उनको आश्वासनको भर पर्ने अवस्था अहिले छैन । किन भने दुवै पक्ष पाएका बेला राजनीतिक प्रतिशोध साँध्न चुक्दैनन् ।
संसद वहिस्कार गरेरै भए पनि पाण्डे सरकारको १ महिना कटाउने र सरकार गिरेपछि बहुमत देखाएर सरकारमा दाबी गर्ने रणनीतिबारे पनि एमालेमा छलफल भइरहेको छ ।
यी र यस्तै खेलले कोही व्यक्ति विशेष केही दिनका लागि सत्ताको कुर्सीमा पुग्लान, झण्डावाला गाडीमा कुद्लान, नागरिकले उठाएको करको पैसामा हालीमुहाली गर्लान्, तर नागरिकमा भने वितृष्णा बढाउने निश्चित छ । मन्त्री सांसद र सिमित व्यक्तिको प्रभावका भरमा विनियोजित बजेटले निर्धारित लक्ष्य पूरा हुनै सक्दैन । क्षमता भन्दा बहुवर्षे योजनाको भारीले प्रादेशिक बजेट प्रणालीकै खिल्ली उडारहेका बेला भइरहेका सत्ता खेलले प्रादेशिक संरचनाप्रति अविश्वास र आक्रोश बढ्ने निश्चित छ ।
Related News
सम्बन्धित समाचार
पत्रकार पोखरेल सम्मानित
रेवान पोखरामा विश्वराज
फिल्म ‘ईश्वर’ प्रदर्शन सुरु
कर्जा विस्तार हुनेगरी मौद्रिक नीति ल्यायौंः गभर्नर अधिकारी
बेनी–जोमसोम सडक अवरुद्ध
hero news full width
मुख्य समाचार
गायक तथा गीतकार एलपी जोशी रहेनन्
आज मौद्रिक नीति सार्वजनिक हुँदै
श्रावण ११, २०८१पोखराको गन्नीलाई रनिङ सिल्ड
श्रावण १०, २०८१लीलादेवी बनिन् पहिलो महिला मुख्यसचिव
श्रावण १०, २०८१राइड सेयरिङविरुद्ध पोखराका यातायात व्यवसायीको आन्दोलन
श्रावण १०, २०८१जहाज सि चेकका लागि पोखरा आउँदै थियो
श्रावण ९, २०८१