पोखरा । प्रधानमन्त्री पुष्पकमल दाहाल प्रचण्डलाई पोखरामा सहकारी पीडितले कालो झण्डा देखाएका छन् । पोखरा सभागृहमा पार्टीको प्रदेस्तरीय प्रशिक्षणलाई सम्बोधन गर्न छिर्ने क्रममा पोखराको सूर्यदर्शन सहकारी पीडितले कालो झण्डा र ब्यानर देखाएका हुन् ।

‘सहकारी पीडितलाई न्याय दे’ लगायत नारा लगाएका उनीहरुले खलतीबाट निकालेर कालो झण्डा देखाएका हुन् । त्यसक्रममा प्रहरीले ११ जनालाई नियन्त्रणमा लिएको छ । प्रहरी हस्तक्षेपका क्रममा २ जना प्रदर्शनकारी सामान्य घाइते भएका छन् ।

पोखरा स्वास्थ्य विज्ञान प्रतिष्ठानको सिनेट बैठक सकेर पोखरा सभागृह आएका बेला उक्त घटना भएको हो । पोखराको सूर्यदर्शन सहकारीको रकम गृहमन्त्री रवी लामिछाने तत्कालीन अवस्थामा एमडी रहेको गोरखा मिडिया प्रालिका नाममा सारेर अपचलन गरेको रिर्पोट आएको छ । प्रहरीमा यसबारेमा जाहेरी पर्दा समेत गृहमन्त्रीमाथि कारवाही नभएको भन्दै पीडितहरु प्रधानमन्त्रीप्रति आक्रोशित भएका हुन् ।