पोखरा । सगरमाथा सिखरमा पुगेर झर्दै गर्दा पोखराका युवा एवं पर्यटन व्यवसायी बिनोदबाबु बस्ताकोटीको निधन भएको छ । उनको घर पोखरा २६ खरानेफाँट हो ।

जेठ ९ गते बिहान सगरमाथा सिखरमा पुगेर झर्दै गरेका उनको सोही दिन साँझ ५ बजेतिर चौथो शिविरको माथि बालकोनीको तल लगभग ८ हजार २ सय ५० मिटरमा आइपुग्दा निधन भएको पुष्टि भएको छ ।

उनी पायोनियर एड्भान्चरबाट उनका शेर्पा गाइड लिएर सगरमाथा गएका थिए ।

आधार शिविर व्यवस्थापन गर्ने उनी गएको कम्पनीको क्याम्प म्यानेजर कोही नहुँदा उनले प्रयोग गरेको झोला किचनका स्टाफमार्फत् आधार शिविरमा अवस्थित पर्यटन विभागको फिल्ड कार्यालयमा बुझाइएको छ ।

पोखरा महानगरका मेयर धनराज आचार्यले घटनाप्रति दुख व्यक्त गर्दै मृतकप्रति श्रद्धाञ्जली र परिवारजनमा समवेदना दिएका छन् ।

उनको सम्मानजन बिदाइमा सहभागी हुन मेयर आचार्यले आग्रह गरेका छन् । शव ल्याउन बाँकी रहेकाले समय र स्थान भने उनले तोकेका छैनन् ।