पोखरा । गण्डकी प्रदेशमा नयाँ मुख्यमन्त्री नियुक्ति भएलगत्तै प्रदेश सभाको बैठक आज बस्ने भएको छ । प्रदेश सभा सचिवाललयले सूचना जारी गरी जेठ १७ गते बिहीबार दिउँसो १ बजे प्रदेश सभाको बैठक बस्ने भएकाले उपस्थितिका लागि सदस्यहरुलाई आग्रह गरेको छ ।

बजेटको सिद्धान्त र प्राथमिकता प्रस्तुत गर्नका लागि प्रदेश सभाको बैठक डाकिएको हो । आर्थिक मामिला मन्त्री डा.टकराज गुरुङले संसदमा बजेटको सिद्धान्त र प्राथमिकता प्रस्तुत गर्नेछन् । मुख्यमन्त्रीको विज्ञ टिम बजेटको सिद्धान्त र प्राथमिकता लेखनमा मंगलबारदेखि नै खटिएको थियो । राति अबेरसम्म खटिएको टिमले तयार गरेको बजेटको सिद्धान्त र प्राथमिकता मन्त्रिपरिषदको बैठकले पारित गरिसकेको छ ।

जेठ १५ गते दिनको १ बजे बस्ने भनिएको प्रदेश सभाको बैठक अर्को सूचना जारी नभएकासम्मका लागि स्थगित भएको थियो । यसअघि प्रदेश सभाको बैठक जेठ ११ गते बसेको थियो । बजेटको प्राथमिकता र सिद्धान्त प्रस्तुत गर्न भनेर बोलाइएको बैठक प्रमुख प्रतिपक्षी दल कांग्रेस र विपक्षी दल राप्रपाका सांसद अनुपस्थित भएपछि ५ मिनेट बसेर स्थगित भएको थियो ।

सामान्य अवस्थामा बजेट पेस हुनुभन्दा १५ दिन अगावै बजेटको प्राथमिकता र सिद्धान्त सदनमा पेस गर्नुपर्ने हुन्छ । प्रदेशको बजेट असार १ गते ल्याउनुपर्ने प्रावधान छ । तर राजनीतिक उथलपुथलले प्रदेशको बजेट अलपत्र परेको छ । बुधबार नियुक्त भएर पदभार ग्रहण गरेका मुख्यमन्त्री सुरेन्द्रराज पाण्डेलाई सदनमा बहुमत पु¥याउन उत्तिकै सकस छ । त्यसैले यसपालिको बजेट अगावै सदन अन्त्य गरेर अध्यादेशबाट बजेट ल्याउने सम्भावना प्रबल छ । यसबारेमा मुख्यमन्त्रीले विज्ञहरुसँग सल्लाह लिइरहेका छन् ।