पोखरा । काठमाडौंबाट पोखरा हुँदै बेनी जाँदै गरेको बस कास्कीको अन्नपूर्ण गाउँपालिका १ लेवाडेमा बिहीबार बिहान दुर्घटनाग्रस्त हुँदा ८ जना घाइते भएका छन् ।

बा५ख २८५ नम्बरको बस बिहान पाैने ४ बजेतिर सडकको दायाँ साइडतर्फ नालामा पल्टिँनदा बसमा सवार १३ जनामध्ये ८ जना घाइते भएका हुन् । घाइतेको तत्काल उद्धार गरी उपचारका लागि पोखराका विभिन्न अस्पतालमा लगिएको छ ।

घाइतेमा पर्वतको जलजला घर भएका गाडी चालक ३६ वर्षे बलबहादुर फगामीमगर, म्याग्दीको मालिका ३ का टकबहादुर कामी, म्याग्दीकै मंगला १ निस्कोटका प्रेम पुन छन् । मंगलाकै तीलक शर्मा, म्याग्दीकै रञ्जना हमाल, म्याग्दीको मालिका दरबाङकी सविता श्रीपाली, मंगला १ सिमहकी हरि केसी र मालिका ६ दरबाङका भीमसेन अधिकारी छन् ।

घाइते सबैको अवस्था मध्यम र सामान्य रहेको प्रहरीले जनाएको छ । दुर्घटना कसरी भयो भन्ने अनुसन्धान भइरहेको प्रहरीले जनाएको छ । घाइतेमध्ये ४ जनाको मणिपाल, ३ जनाको गण्डकी मेडिकल कलेज र १ जनाको बेनीमा उपचार भइरहेको छ ।