पोखरा । चिप्लेढुंगाको नीरमाया दोहोरी साँझले दोहोरी साँझस्तरीय महिला भलिबल प्रतियोगिताको उपाधि जितेको छ । पोखरा कलाकार खेलकुद संघ आयोजनामा फूलबारीस्थित ग्रिन गाडन स्पोटस् हबमा आयोजित प्रतियोगिताको फाइनलमा वाराही दोहोरी साँझलाई हराएको हो । प्रतियोगितामा आयोजक तेस्रो भयो ।

विजयी भएसँगै नीरमायाले खसी पुरस्कार प्राप्त गरेको छ । नीरमायाबाट सीता मगर, इन्दिरा पुन मगर, नीरुता थापा मगर, माया पुन मगर, एलिना पुन मगर, सुष्मा पुन मगर, सुनिमा गुरुङ, लक्ष्मी गुरुङ खेलेका थिए । प्रशिक्षक रोशन थापा मगर थिए ।

नीरमाया दोहोरीकै सीता काउचा मगर उत्कृष्ट खेलाडी बन्दै भलिबल प्राप्त गरिन् । प्रतियोगितामा ८ टिमले भाग लिएका थिए ।

सो अवसरमा रस्साकस्सी र म्यूजिकल चेयर प्रतियोगितासमेत भएको थियो । नीरमाया दुवैतर्फ प्रथम भएको सञ्चालक जीवन गुरुङले बताए । पोखरा लोकदोहोरी रेष्टुरेन्ट व्यवसायी संघ अध्यक्ष समेत रहेका गुरुङले भाइचाराको सम्बन्ध स्थापित गर्न यस्ता प्रतियोगिता आयोजना हुँदै जानुपर्ने बताए । सञ्चालक सुरेन्द्र गुरुङले दोहोरीका कलाकार खेलमा समेत उत्कृष्ट भएको देख्न पाउँदा खुसी लागेको उल्लेख गरे ।