पोखरा । नेपाली कांग्रेस गण्डकी प्रदेश संसदीय दलका नेता सुरेन्द्रराज पाण्डे ५२ दिनपछि गण्डकीको मुख्यमन्त्रीमा फर्किएका छन् । सर्वोच्च अदालतले पाण्डेलाई संविधानको धारा १६८ (३) बमोजिम मुख्यमन्त्री नियुक्त गर्न परमादेश जारी गरेपछि प्रदेश प्रमुख डिल्लीराज भट्टले बुधबार नियुक्त गरेका हुन् । पाण्डेले बुधबार नै सपथ पनि लिएका छन् । निवर्तमान मुख्यमन्त्री खगराज अधिकारीले विश्वासको मत लिँदा असंवैधानिक कदम चालेको भन्दै पाण्डे सर्वोच्च पुगेका थिए । उनको रिटमा न्यायाधीशद्वय कुमार रेग्मी र सुनिलकुमार पोखरेलको इजलासले विश्वासको मत लिने प्रक्रिया असंवैधानिक ठहर गरेको छ ।
तत्कालीन समयमा अधिकारीको पक्षमा ३० मत परेको थियो भने विपक्षमा २७ र २ मत तटस्थ थियो । सभामुख कृष्ण धितालले संविधान अनुसार आफूलाई मत दिने अधिकार रहेको भन्दै ३० मतलाई नै बहुमत हुने घोषणा गरिदिएका थिए । सर्वोच्चले लामो व्याख्या गर्दै विश्वासको मतका लागि ३१ मत अनिवार्य हुने फैसला गरेको छ । योसँगै प्रदेशसभाको बहुमतको प्रश्न पनि निमिट्यान्न भएको छ । मुख्यमन्त्री पाण्डे यसअघि चैत २५ गतेदेखि पदमुक्त भएका थिए । पाण्डेले अघिल्लो कार्यकालमा झण्डै १ वर्ष मुख्यमन्त्रीको रुपमा काम गरेका थिए ।
थापा र गुरुङ मन्त्री
मुख्यमन्त्री सुरेन्द्रराज पाण्डेले २ जना मन्त्री नियुक्त गरेका छन् । उनले सपथ लिएसँगै मन्त्रीहरुको पनि सपथ गराइएको हो । कांग्रेस संसदीय दलका उपनेता विन्दुकुमार थापा र लमजुङका सांसद डा. टकराज गुरुङ मन्त्री बनेका छन् । थापा ऊर्जा, जलस्रोत तथा खानेपानी र सामाजिक विकास तथा स्वास्थ्य मन्त्री बनेका छन् । कास्कीका थापा अघिल्लो ५ वर्षे कार्यकालमा प्रदेशकै कानुन मन्त्री थिए । गुरुङलाई आर्थिक मामिला मन्त्रालयको जिम्मेवारी तोकिएको छ । लामो समय विद्यार्थी आन्दोलनमा लागेका गुरुङ पर्यटन अर्थशास्त्रका पिएचडी हुन् । उनी लमजुङका पार्टी सभापति समेत हुन् । मुख्यमन्त्री पाण्डेको अघिल्लै कार्यकालमा पनि उनको नाम अर्थमन्त्रीका लागि चर्चामा थियो । अर्थमा तनहुँका जीतप्रकाश आले आएपछि उनी मन्त्रिमण्डलमा अटाएका थिएनन् ।
‘गर्भवती र सुत्केरीका लागि आवास’
मुख्यमन्त्री पाण्डेले गण्डकी प्रदेशका १२ अस्पतालमा गर्भवती तथा सुत्केरी महिलाका लागि आवास स्थापना गर्ने निर्णय गरेका छन् । पाण्डेले पदभार ग्रहण गर्दै यस्तो निर्णय गरेका हुन् । ‘प्रदेश सरकार मातहतका १२ वटा अस्पतालहरूमा गर्भवती तथा सुत्केरी महिलाका लागि आवास स्थापना तथा सञ्चालन गरिने छ,’ निर्णयमा भनिएको छ ।
यस्तै, स्थानीय तहलाई कानुनी ज्ञान भएका जनशक्ति व्यवस्थापन गर्न न्यायिक सहजकर्ताको व्यवस्था गर्ने निर्णयमा पनि उनले हस्ताक्षर गरेका छन् । ‘स्थानीय न्यायिक सहजकर्ता (नियुक्ति तथा परिचालन) कार्यविधि २०८१ तर्जुमा गर्ने निर्णय गरिएको छ,’ निर्णयमा उल्लेख छ ।
मध्यावधिमा पुग्नुहुँदैन : पाण्डे
सपथपछि पत्रकारहरुसँग कुरा गर्दै मुख्यमन्त्री सुरेन्द्रराज पाण्डेले अहिलेकै नियुक्तिमा विश्वासको मत पाउने दाबी गरेका छन् । विश्वासको मत पाउन कठिन भए पनि उपाधारा ५ मा जान नहुने उनको तर्क छ । ‘हामीले ३१ सिट पु¥याउनुपर्छ । अहिले संविधानको धारा १६८ को ३ अनुसार सरकार बनेको छ । विश्वासको मत प्राप्त गर्न नसके ५ मा जान्छ । त्यसमा विश्वासको मत नपाए मध्यावधिमा जान्छ,’ उनले भने, ‘यो अवस्थाको बारेमा सबै सचेत हुनुहुन्छ । कांग्रेस लगायत कुनै पनि पार्टी पुनः चुनावमा जाओस् भन्ने पक्षमा हुनुहुन्न । दलका साथीहरुले यो कुरालाई बुझ्नुहुनेछ ।’
पाण्डे सरकारलाई समर्थन गर्ने वा नगर्ने विषयमा राप्रपा अनिर्णीत
उनले विश्वासको मतका लागि वृहत्तर संवाद गर्ने बताएका छन् । ‘हामी मिलेरै काम गर्ने हो । सरकार बनाउन पनि सहयोग गर्नुहुन्छ भन्ने विश्वास छ,’ अघि भने, ‘५ मा जाँदा चुनावमा जाने खतरा बढ्छ । ३ मा नै टुंगिनुपर्छ । वृहत्तर संवाद र वृहत्तर गरेर जान्छौं ।’ पाण्डेले नीति तथा कार्यक्रम र बजेट संसदबाट ल्याउने बताएका छन् । ‘संसद चलेको बेलामा संसदमै नीति कार्यक्रम र बजेट आउँछ,’ उनले भने । पाण्डेले सर्वोच्च अदालतले संविधानको सही व्याख्या गरेको दाबी गरे ।
सरकारमा कांग्रेसमात्रै
बुधबार विस्तार भएको गण्डकी प्रदेश सरकारमा कांग्रेस मात्रै छ । राष्ट्रिय प्रजातन्त्र पार्टी (राप्रपा) र स्वतन्त्र सांसद राजीव गुरुङ उर्फ दीपक मनाङेलाई समेत फकाएर सँगै सरकारमा लैजाने तयारी गरेपनि उनीहरु सरकारमा सामेल भएनन् । राप्रपा नेता पञ्चराम गुरुङले नयाँ सरकारले लिने जिम्मेवारी अनुसार भूमिका हुने बताए । विहिबारको संसद बैठकमा राप्रपा प्रतिपक्षी बेन्चमा नै बस्ने गुरुङको भनाइ छ । ‘अदालतले नै निर्णय गरेपछि बधाई भन्नुपर्छ । तर राप्रपा तुरुन्तै कुनै निर्णयमा पुगेको छैन,’ उनले भने, ‘अहिलेलाई प्रतिपक्षी वेन्चमा नै बस्छौं । नयाँ सरकारले कसरी हेर्छ त्यसअनुसार अगाडि बढ्छौं ।’ उनले सबै दलहरुसँग संवाद र छलफल चलिरहेको बताए । ‘छलफल संवाद भइरहेको छ । हाम्रा केही सिद्धान्त र प्राथमिकता छन् । साझा धारणा बनाएपछि मात्रै अगाडि बढ्ने हो,’ अघि थपे, ‘४० बुँदे मागलाई सम्बोधन गर्न हिजोको सरकारले ध्यान दिएन । अहिलेको सरकारले के गर्छ हेर्न बाँकी छ । हिंसा र निषेधको राजनीतिमा हामी विश्वास गर्दैनौं ।’ यद्यपि केन्द्रले लिने निर्णयमा आफूहरु चल्ने गुरुङले सुनाए ।
‘हामी जति ठूलो नेता भए पनि प्रदेश सरकार भनेको टिभी हो । रिमोट कन्ट्रोलले चल्छ । रिमोट केन्द्रमा छ,’ उनी भन्छन्, ‘हामीसँग छलफल भएपछि केन्द्रमा जानकारी गराउछौं । मुख्य भूमिका केन्द्रमा छ ।’ राप्रपाको केन्द्रीय कार्यसम्पादन समितिको बैठकले यसअघि बनेको गठबन्धनलाई समर्थन नगर्ने निर्णय गरेको थियो । तर अहिले बनेको पाण्डे सरकारलाई समर्थन गर्ने वा नगर्ने कुनै निर्णय भएको छैन ।
उता स्वतन्त्र सांसद राजीव गुरुङ (दीपक मनाङे) पनि बुधबार सरकारमा सामेल भएनन् । सरकारको पक्षमा ३० पुगेको खण्डमा ३१ अंक पु¥याउने बेलामा आफूले साथ दिने उनको भनाइ थियो ।
गण्डकीमा पहिलो दल नेपाली कांग्रेससँग २७ सिट छ भने एमालेको २२, माओवादीको सभामुखसहित ८, राप्रपाको २ र १ जना स्वतन्त्र सांसद छन् । एमाले र माओवादी बाहिर राखेर कांग्रेसले बहुमत पु¥याउन सक्दैन । बहुमतका लागि ३१ सिट चाहिन्छ ।
Related News
सम्बन्धित समाचार
पत्रकार पोखरेल सम्मानित
रेवान पोखरामा विश्वराज
फिल्म ‘ईश्वर’ प्रदर्शन सुरु
कर्जा विस्तार हुनेगरी मौद्रिक नीति ल्यायौंः गभर्नर अधिकारी
बेनी–जोमसोम सडक अवरुद्ध
hero news full width
मुख्य समाचार
गायक तथा गीतकार एलपी जोशी रहेनन्
आज मौद्रिक नीति सार्वजनिक हुँदै
श्रावण ११, २०८१पोखराको गन्नीलाई रनिङ सिल्ड
श्रावण १०, २०८१लीलादेवी बनिन् पहिलो महिला मुख्यसचिव
श्रावण १०, २०८१राइड सेयरिङविरुद्ध पोखराका यातायात व्यवसायीको आन्दोलन
श्रावण १०, २०८१जहाज सि चेकका लागि पोखरा आउँदै थियो
श्रावण ९, २०८१