पोखरा । गृह मन्त्रालयले २५ जना बुधबार सहसचिवको सरुवा गर्दा गण्डकीका २ जिल्लाका प्रमुख जिल्ला अधिकारी फेरिएका छन् । कास्कीका वासुदेव घिमिरे गृह मन्त्रालयमा सरुवा भएका छन् । उनको ठाउँमा राष्ट्रिय विपद जोखिम न्यूनीकरण तथा व्यवस्थापन प्राधिकरणबाट भरतमणि पाण्डे आउने भएका छन् । घिमिरे पोहोर जेठ ८ गते कास्कीमा हाजिर भएका थिए ।

यसैगरी नवलपरासी वर्दघाट सुस्तापूर्वकी प्रजिअ कल्पना श्रेष्ठ इलामको प्रजिअमा सरुवा भएकी छन् । उनको ठाउँमा अरुण पोखरेल आएका छन् । श्रेष्ठ पोहोर असार ११ मा नवलपुरमा हाजिर भएकी हुन् ।

यसैगरी कास्कीका पूर्व प्रजिअ जयनारायण आचार्यको सुनसरीबाट कारागार व्यवस्थापन विभागको महानिर्देशकमा सरुवा भएको छ । सुनसरीमा कास्कीका पूर्व एलडिओ रामचन्द्र तिवारी प्रजिअ भएका छन् । उनी उद्योग मन्त्रालयबाट अघिल्लो साता गृहमा सरुवा भएका थिए ।

यसैगरी गण्डकीको मुख्यमन्त्री तथा मन्त्रिपरिषद् कार्यालयबाट गृहमा सरुवा भएका तीर्थराज भट्टराईले कसुरजन्य सम्पति व्यवस्थापन विभागमा महानिर्देशकको जिम्मेवारी पाएका छन् ।