पोखरा । गण्डकीका मुख्यमन्त्री खगराज अधिकारीले विद्यार्थीलाई आधारभूत सीप प्रदान गर्न कक्षा ९ र १० को पाठ्यक्रम तयार भएको बताएका छन् ।

रेडक्रस सोसाइटी कास्की आयोजनामा शुक्रबार छोरेपाटन माविमा भएको ४१ औैं जुनियर/युवा तथा ३० औं शिक्षक नायक गोष्ठी उद्घाटन गर्दै उनले सो कुरा बताएका हुन् । उनले आफूले पहिलो पटक मुख्यमन्त्री हुँदा थालनी गरेको काम अहिले विज्ञ राखेर पूरा गरेको बताए ।

तयार भएको पाठ्यक्रम मेडिकल इमर्जेन्सी, प्राकृतिक प्रकोप, बाढी नियन्त्रण तथा महिला हिंसाविरुद्धका सीप लिन प्रभावकारी बन्ने विश्वास उनको छ । ‘९ र १० कक्षाको लागि पाठ्यक्रम बनाउन पहिला मुख्यमन्त्री हुँदा सुरु गरेको थिए, अहिले विज्ञ राखेर त्यसको पाठ्यक्रम तयार भएको छ,’ उनले भने ।

कास्की रेडक्रसले गरेका कार्यको प्रंशसा गर्दै विपद्मा रेडक्रस भन्ने कुरा स्थापित गर्न युवा रेडक्रसकर्मीको भूमिका महत्वपूर्ण रहेको बताए ।

कार्यक्रममार्फत मुख्यमन्त्री अधिकारीले मानव सेवामा समर्पित रहँदै आपत्विपद्को बेलामा साथी बन्ने जुनियर रेडक्रसका योद्धाहरू तथा उनीहरूलाई सहयोग गर्ने शिक्षक नायकलाई गरे ।

उनले आफूसमेत रेडक्रसको आजीवन सदस्य रहेको भन्दै सोसाइटीले गर्ने गतिविधिमा सदैव साथ रहने प्रतिबद्धता जनाए । युवा रेडक्रस सर्कल छोरेपाटन माविको आतिथ्य तथा व्यवस्थापनमा कार्यक्रम भएको हो ।