पोखरा । गण्डकीका मुख्यमन्त्री खगराज अधिकारीले आफ्नो ध्यान जनताको भलो हुने काममा रहेको बताएका छन् ।

मादी गाउँपालिका वडा ७ मा निर्मित थाक समाजघरको शनिबार समुद्घाटन गर्दै उनले धेरै बोल्नेभन्दा पनि काम गरेर जनतालाई अनुभूति दिलाउने कोशिसमा रहेको खुलाए ।
‘बाटो निर्माण भइरहको छ, यसलाई सिक्लेससम्म पु¥याउने कोसिस गर्नेछौं, खानेपानी लगायतका यहाँका समस्याको बारेमा म जानकार छु, ती समस्या समाधान गर्न निरन्तर लाग्नेछु,’ उनले भने ।

मादी गाउँपालिकामा विकास निर्माण काम तीव्रताका साथ गर्दै जाने प्रतिबद्धता उनको थियो । गण्डकी प्रदेशका सबै जनतालाई सरकारको महसुस गराउने खालको नीति तथा कार्यक्रम र बजेट निर्माण गर्ने तयारी भैरहेको समेत मुख्यमन्त्री अधिकारीले खुलाए ।

गण्डकी प्रदेशका ऊर्जा जलस्रोत तथा खानेपानी मन्त्री वेदबहादुर गुरुङ ‘श्याम’ ले जनताले भोग्नु परेका समस्या समाधान गर्न आफ्नोतर्फबाट काम गरिरहेको बताए । आफू सोही क्षेत्रको जनप्रतिनिधि समेत रहेको कारण जनताका सुखदुख नजिकबाट बुझेरनै प्राथमिकताको आधारमा काम गर्न कस्सिएको बताए । समाजघर निर्माणमा सहयोग गर्ने दानविर, जग्गादातालाई मन्त्री गुरुङले सम्मान गरे ।